Presidenti egjiptian takohet me kreun e CIA-s, bën thirrje për marrëveshje për zgjidhjen e krizës iraniane
Presidenti egjiptian, Abdel Fattah al-Sisi, është takuar në Kajro me drejtorin e CIA-s, John Ratcliffe, si dhe ka bërë thirrje për arritjen e një marrëveshjeje për zgjidhjen e krizës iraniane dhe rivendosjen e stabilitetit rajonal, transmeton Anadolu.
Presidenca egjiptiane njoftoi se Sisi shprehu “mbështetjen e plotë” të Kajros për përpjekjet që synojnë arritjen e një marrëveshjeje gjithëpërfshirëse që do të zgjidhte krizën iraniane, “duke kontribuar kështu në rivendosjen e sigurisë dhe stabilitetit rajonal dhe duke garantuar lirinë e lundrimit ndërkombëtar”.
Ai gjithashtu theksoi kundërshtimin e Egjiptit ndaj çdo sulmi kundër sigurisë dhe sovranitetit të vendeve arabe dhe nënvizoi nevojën për zgjidhjen e krizave rajonale përmes mjeteve diplomatike, duke trajtuar njëkohësisht shkaqet e tyre themelore.
Tensionet rajonale u përshkallëzuan pasi SHBA-ja dhe Izraeli nisën sulme ndaj Iranit në shkurt, duke e nxitur Teheranin të përgjigjej me sulme ndaj vendeve të rajonit ku ndodhen kapacitete ushtarake amerikane.
Teherani gjithashtu mbylli Ngushticën e Hormuzit, një nga rrugët ujore më të rëndësishme në botë për transportin e naftës dhe gazit.
Washingtoni dhe Teherani arritën një marrëveshje në qershor për t’i dhënë fund armiqësive dhe për të rihapur Ngushticën e Hormuzit për lundrim, por marrëveshja më vonë dështoi për shkak të mosmarrëveshjeve mbi lundrimin dhe aranzhimet e sigurisë në këtë rrugë strategjike ujore.
Gjatë takimit të sotëm, presidenti egjiptian po ashtu bëri thirrje për zbatimin e plotë të marrëveshjes së armëpushimit në Gaza.
Sipas presidencës, Sisi vlerësoi përpjekjet e ndërmjetësve për zbatimin e udhërrëfyesit të armëpushimit në Gaza dhe theksoi angazhimin e Egjiptit për konsolidimin e armëpushimit, mbrojtjen e civilëve, garantimin e qasjes së ndihmave dhe krijimin e kushteve për një proces politik drejt zgjidhjes me dy shtete.
Më 29 shtator të vitit 2025, presidenti amerikan, Donald Trump, njoftoi një plan prej 20 pikash për t’i dhënë fund luftës në Gaza. Ai përfshinte lirimin e pengjeve izraelite, çarmatimin e Hamasit, tërheqjen e pjesshme izraelite, formimin e një administrate teknokrate dhe dislokimin e një force ndërkombëtare stabilizuese. Faza e parë e planit hyri në fuqi më 10 tetor të vitit 2025.
Faza e dytë parashikon një tërheqje më të gjerë të ushtrisë izraelite, rindërtimin dhe fillimin e procesit të çarmatimit. Megjithatë, Izraeli vazhdon të mbajë nën pushtim rreth 70 për qind të Rripit të Gazës dhe këmbëngul se fraksionet palestineze duhet të çarmatosen përpara se ai të tërhiqet.
Marrëveshja pasoi dy vjet të luftës gjenocidale të Izraelit në Gaza, e cila që nga tetori i vitit 2023 ka vrarë afër 74.000 njerëz, ka plagosur mbi 174.000 të tjerë dhe e ka lënë të gjithë enklavën në rrënoja.
