SHBA-ja vendos sanksione të reja ndaj elitës në pushtet të Kubës, subjekteve të energjisë dhe minierave
SHBA-ja njoftoi të enjten sanksione të reja që synojnë elitën në pushtet në Kubë, një bankë shtetërore dhe katër subjekte të lidhura me sektorët e energjisë, metaleve dhe minierave të vendit, transmeton Anadolu.
Departamenti amerikan i Shtetit tha se masat janë pjesë e përpjekjeve më të gjera të administratës së presidentit Donald Trump për të frenuar atë që Washingtoni e përshkruan si represion i regjimit kuban dhe aktivitete që kërcënojnë sigurinë kombëtare të SHBA-së dhe stabilitetin në Hemisferën Perëndimore.
Mes personave të sanksionuar është Fidel Ernesto Castro Calis, nipi i ish-presidentit kuban Raul Castro. Departamenti i Shtetit tha se Castro Calis është shënjestruar në bazë të një urdhri ekzekutiv të nënshkruar nga presidenti amerikan Donald Trump në maj.
Washingtoni sanksionoi gjithashtu Banco Exterior de Cuba, duke iu referuar rolit të saj në sektorin e shërbimeve financiare të Kubës.
Katër subjektet e tjera janë shënjestruar për përfshirjen e tyre në industritë kubane të burimeve natyrore dhe energjisë, përfshirë aktivitetet e nxjerrjes së nikelit dhe kobaltit, si dhe prokurimin dhe aktivitetet tregtare të lidhura me naftën.
Sipas sanksioneve, asetet e individëve dhe subjekteve të përcaktuara që ndodhen nën juridiksionin e SHBA-së do të bllokohen. Personave amerikanë gjithashtu u ndalohet kryerja e transaksioneve që përfshijnë palët e sanksionuara, përveç rasteve kur autorizohen nga Departamenti amerikan i Thesarit.
Sekretari amerikan i Shtetit, Marco Rubio, tha se qeveria kubane mbetet kërcënim serioz.
“Regjimi komunist kuban vazhdon të përbëjë kërcënim të thellë dhe shumëdimensional për sigurinë kombëtare të SHBA-së dhe stabilitetin e Hemisferës sonë”, tha Rubio në deklaratë.
Ai akuzoi familjen Castro dhe zyrtarët e lidhur me regjimin për kontrollin e ekonomisë së ishullit, duke shtuar se masat e fundit synojnë rrjetet që mbështesin sektorin financiar, minerar dhe atë energjetik të Kubës.
