Varrimi shtetëror i kriminelit të luftës ndez reagimin e Kroacisë, Plenkoviç paralajmëron Serbinë
Kryeministri i Kroacisë, Andrej Plenkoviç, ka kritikuar Serbinë lidhur me vendimin për varrimin me nderime shtetërore dhe ushtarake të ish-komandantit të ushtrisë serbe të Bosnjës, Ratko Mladiç, i dënuar për gjenocid dhe krime lufte.
Plenkoviç, i cili është edhe president i Bashkimit Demokratik Kroat (HDZ), ka paralajmëruar se një vendim i tillë mund të ketë pasoja për rrugëtimin e Serbisë drejt Bashkimit Evropian.
Deklaratat e tij janë interpretuar si një mesazh i drejtpërdrejtë ndaj Beogradit: nëse Mladiç varroset me nderime shtetërore dhe ushtarake, Serbia rrezikon të përballet me pengesa të mëtejshme në procesin e integrimit evropian.
Ndërkohë, presidenti i Serbisë, Aleksandar Vučić, është përballur me presion për qëndrimin që do të mbajë lidhur me ceremoninë e varrimit. Vučić, i cili drejton vendin që prej vitit 2017, ka thënë se Serbia do të ndihmojë në organizimin e kthimit dhe varrimit të trupit të Mladiçit, ndërsa Ministria e Drejtësisë ka njoftuar se ai do të varroset me nderimet më të larta shtetërore.
Në këtë klimë, kritika e Plenkoviç vë në pikëpyetje pretendimet e Beogradit për një politikë të pavarur ndaj presioneve të jashtme dhe ngre pyetjen se deri ku do të shkojë Serbia në përballjen mes qëndrimit të saj ndaj trashëgimisë së Mladiçit dhe ambicies për anëtarësim në BE.
Ratko Mladiç vdiq më 27 gusht në Hagë, në moshën 84-vjeçare, ndërsa vuante dënimin e përjetshëm për gjenocid, krime lufte dhe krime kundër njerëzimit. Ai u dënua për rolin e tij në luftën e Bosnjës, përfshirë masakrën e Srebrenicës dhe rrethimin e Sarajevës.
