Çmimet e banesave në Shkup rriten ndjeshëm: Një metër katror arrin deri në 3.000 euro
Tregu i pasurive të paluajtshme në Evropë vazhdon të shënojë rritje të çmimeve, ndërsa trendi është veçanërisht i theksuar në qytetet që deri vonë konsideroheshin më të përballueshme për blerjen e një shtëpie. Në mesin e tyre është edhe Shkupi, ku çmimet e banesave janë rritur ndjeshëm gjatë periudhës së fundit.
Sipas të dhënave më të fundit të Eurostat për tremujorin e parë të vitit 2026, çmimet e banesave në Bashkimin Evropian janë rritur me 5,1 për qind në bazë vjetore, ndërsa qiratë janë shtrenjtuar me 3 për qind. Të dy treguesit janë mbi normën e inflacionit prej 2,3 për qind në BE.
Rritja e kostove të banimit po ndihet edhe në buxhetet familjare. Gjatë vitit 2025, një banor mesatar i BE-së shpenzonte 18,9 për qind të të ardhurave të disponueshme për banim, ndërsa në disa vende kjo përqindje kalonte 30 për qind.
Megjithatë, dallimet mes qyteteve evropiane janë të mëdha. Ndërsa Parisi, Londra, Cyrihu dhe Luksemburgu renditen ndër tregjet më të shtrenjta, disa kryeqytete të Ballkanit vazhdojnë të ofrojnë çmime dukshëm më të ulëta.
Shkupi, sipas të dhënave në dispozicion, ende renditet ndër kryeqytetet evropiane më të përballueshme për blerjen e një prone, edhe pse diferenca me qytetet e tjera të Ballkanit po zvogëlohet me shpejtësi.
Në gjysmën e parë të vitit 2026, çmimi mesatar i kërkuar për shitjen e një apartamenti në Shkup ishte rreth 2.156 euro për metër katror, sipas të dhënave të „CenaKvadrat“. Kjo do të thotë se një banesë prej 60 metrash katrorë do të kushtonte rreth 129.400 euro.
Çmimet më të larta janë regjistruar në Komunën Qendër, ku një metër katror në ndërtesat e reja, në lokacione atraktive, arrin afër 3.000 euro.
Në krahasim me vitin e kaluar, kur çmimi mesatar në Shkup sillej rreth 1.670 euro për metër katror, rritja është e konsiderueshme.
