Nepali kërkon nga Meta dhe TikTok të heqin përmbajtjet grafike dhe mashtruese të krijuara me IA për përmbytjet
Nepali u ka kërkuar kompanive të platformave Meta dhe TikTok të heqin imazhet grafike, videot e krijuara me inteligjencë artificiale, kodet mashtruese QR për donacione dhe postimet çorientuese që po qarkullojnë pas përmbytjeve shkatërruese të rrëmbyeshme, transmeton Anadolu.
Sipas The Kathmandu Post, zyrtarët qeveritarë zhvilluan bisedime me përfaqësuesit me bazë në Nepal të platformave të mediave sociale, duke kërkuar veprime më të shpejta kundër përmbajtjeve që mund të çorientojnë publikun, të pengojnë operacionet e ndihmës ose t’u shkaktojnë shqetësim të mëtejshëm familjeve të viktimave.
Bijay Kumar Roy, koordinator i grupit punues të qeverisë për rregullimin dhe menaxhimin e mediave sociale, tha se autoritetet u kërkuan kompanive të heqin përmbajtjet e papërshtatshme dhe mashtruese sapo ato të raportohen.
Zyrtarët gjithashtu u kërkuan platformave që algoritmet e tyre të jenë më proaktive në zbulimin dhe bllokimin e përmbajtjeve grafike dhe të rreme.
Autoritetet thanë se pamje të vjetra janë rikthyer në qarkullim duke u paraqitur si pamje nga katastrofa e fundit, ndërsa videot dhe imazhet e krijuara me inteligjencë artificiale po paraqiten si autentike. Gjithashtu janë shfaqur kode mashtruese QR që kërkojnë donacione për viktimat e përmbytjeve.
Sipas raportit, Meta dhe TikTok aktualisht reagojnë ndaj postimeve të raportuara brenda 24 deri në 48 orësh, duke i shtyrë zyrtarët të kërkojnë veprime më të shpejta.
Masa vjen teksa numri i përgjithshëm i viktimave nga përmbytjet në Nepal dhe Kinë ka arritur në 543, ndërsa 1.281 persona, përfshirë 856 të huaj, vazhdojnë të jenë të zhdukur.
Përmbytjet dhe rrëshqitjet e dheut goditën Nepalin verior dhe qendror të mërkurën, duke përfshirë komunitetet përgjatë lumenjve Bhotekoshi dhe Trishuli dhe duke shkatërruar shtëpi, ura dhe rrugë.
Në anën kineze, balta dhe mbeturinat goditën portin Gyirong në rrethin Gyirong, në Rajonin Autonom Xizang në Kinën jugperëndimore, i njohur gjithashtu si Tibet, duke ndërprerë rrugët, si dhe lidhjet e komunikimit dhe furnizimin me energji elektrike.
Qindra banorë, punëtorë ndërtimi dhe turistë në zonat e prekura të qarkut Gyirong janë evakuuar në zona më të sigurta, ndërsa operacionet e kërkim-shpëtimit vazhdojnë.
