Pakistani: Pakti i mbrojtjes i Mekës është i natyrës mbrojtëse, mbetet i hapur për vendet e tjera të rajonit
Kryediplomati i Pakistanit tha të dielën se marrëveshja trepalëshe e mbrojtjes e Mekës, e nënshkruar këtë javë nga Turqia, Arabia Saudite dhe Pakistani, është “tërësisht” mbrojtëse dhe nuk është e drejtuar kundër asnjë vendi, transmeton Anadolu.
Në një deklaratë të publikuar në platformën sociale amerikane X, ministri i Jashtëm Ishaq Dar tha se qëllimi i vetëm i Marrëveshjes së Mbrojtjes së Përbashkët të Mekës është forcimi i mëtejshëm i përpjekjeve të përbashkëta për paqen, stabilitetin dhe prosperitetin në rajonin e gjerë.
Marrëveshja, e nënshkruar nga të tri vendet të premten në qytetin e shenjtë mysliman të Mekës, e konsideron sulmin ndaj cilitdo prej vendeve si sulm ndaj të treve.
Dar tha se pakti i mbrojtjes mbetet i hapur për çdo vend të rajonit që është i gatshëm të respektojë parimet e tij themelore dhe t’i zgjidhë dallimet përmes “respektit të ndërsjellë, bashkëpunimit dhe mjeteve paqësore”.
Ai përsëriti se, sipas marrëveshjes, çdo sulm i armatosur i jashtëm ndaj cilitdo prej tri vendeve do të konsiderohet sulm ndaj të gjithave, në përputhje me të drejtën e qenësishme të vetëmbrojtjes individuale dhe kolektive sipas Nenit 51 të Kartës së OKB-së.
Pakti, shtoi ai, nuk shfuqizon dhe as nuk zëvendëson asnjë marrëveshje ekzistuese dypalëshe ose shumëpalëshe midis këtyre vendeve apo me vende dhe organizata të tjera.
Marrëveshja e Mekës “është rezultat i viteve të diskutimeve dhe koordinimit, me një dëshirë të përbashkët për të forcuar bashkëpunimin strategjik në adresimin e sfidave të shumëllojshme të paqes dhe sigurisë dhe avancimin e paqes, stabilitetit dhe prosperitetit rajonal”, shtoi Dar.
Pakti është në përputhje me shtyllat themelore të politikës së jashtme të Pakistanit dhe Islamabadi pret të vazhdojë të punojë ngushtë me të gjitha vendet vëllazërore të rajonit për një paqe dhe stabilitet të qëndrueshëm, tha ai.
“Ne mbetemi të përkushtuar për avancimin e zgjidhjes paqësore të të gjitha konflikteve dhe ndërtimin e një të ardhmeje më të sigurt, të qëndrueshme dhe të begatë për popujt tanë”, tha Dar.
