Mosha e pensionimit po rritet në Evropë, në disa vende arrin deri në 74 vjeç

Mosha e daljes në pension në Evropë pritet të rritet ndjeshëm në dekadat e ardhshme, ndërsa në disa shtete qytetarët e rinj mund të dalin në pension vetëm pas moshës 70-vjeçare. Sipas një analize të bazuar në të dhënat e Organizatës për Bashkëpunim dhe Zhvillim Ekonomik (OECD), Danimarka mund të bëhet vendi me moshën më të lartë të pensionimit, duke arritur deri në 74 vjeç.

Sipas analizës së publikuar nga Euronews, një person që ka hyrë në tregun e punës në moshën 22-vjeçare gjatë vitit 2024, sipas projeksioneve aktuale, mund të fitojë të drejtën për pension të plotë vetëm në moshën 74-vjeçare. Kjo lidhet me mekanizmin danez, i cili e përshtat automatikisht moshën e pensionimit me rritjen e jetëgjatësisë.

Megjithatë, autoritetet daneze po shqyrtojnë mundësinë e zbutjes së këtij mekanizmi. Aktualisht, Parlamenti i Danimarkës ka miratuar rritjen graduale të moshës së pensionimit nga 67 në 70 vjeç deri në vitin 2040.

Edhe vende të tjera evropiane pritet të ndjekin të njëjtin trend. Sipas OECD-së, mosha e pensionimit për gjeneratat e reja mund të arrijë në 71 vjeç në Estoni, ndërsa 70 vjeç në Itali, Holandë, Suedi dhe Qipro. Në Mbretërinë e Bashkuar dhe Portugali pritet të jetë 68 vjeç, ndërsa në Gjermani, Belgjikë, Çeki dhe Rumani rreth 67 vjeç.

Arsyeja kryesore e këtij trendi është plakja e popullsisë dhe ulja e numrit të punëtorëve që kontribuojnë në fondet pensionale. Sipas OECD-së, në vitin 2050 për çdo dy persona në moshë pune do të ketë afërsisht një pensionist, gjë që ushtron presion të madh mbi sistemet pensionale.

Ekspertët paralajmërojnë se rritja uniforme e moshës së pensionimit mund të jetë e padrejtë, pasi jo të gjithë kanë të njëjtat kushte pune dhe jetëgjatësi. Punonjësit në profesione fizike, si ndërtimtaria, prodhimi, transporti apo shëndetësia, e kanë shumë më të vështirë të punojnë deri në moshën 70-vjeçare ose më shumë.

Sipas analizës, Evropa me shumë gjasa do të vazhdojë ta rrisë moshën e pensionimit për shkak të ndryshimeve demografike, duke e bërë modelin tradicional të daljes në pension në moshën 65-vjeçare gjithnjë e më pak të zakonshëm për gjeneratat e reja.