Shoferi që i preu rrugën të riut në “Rrugën e Plastikave” ishte nën ndikimin e drogës, Prokuroria kërkon paraburgim
Prokuroria Themelore Publike e Shkupit njoftoi se ka hapur hetim ndaj shoferit që mbrëmë shkaktoi aksidentin tragjik në rrugën “Plastikarska”, ku humbi jetën një motoçiklist 19-vjeçar. Ai do të ndiqet penalisht për veprën “Vepra të rënda kundër sigurisë së njerëzve dhe pasurisë në komunikacion”, ndërsa nga Prokuroria bëjnë të ditur se i dyshuari ishte nën ndikimin e drogës dhe kishte kaluar vijën e dyfishtë të pandërprerë në bulevard.
“31-vjeçari i dyshuar mbrëmë në orët e mbrëmjes drejtonte një veturë ‘Audi A4’ në bulevardin ‘Nikolla Karev’ dhe, kur arriti në kryqëzimin me rrugën ‘Prohor Pçinski’, nuk respektoi sinjalizimin rrugor. Duke kaluar vijën e dyfishtë të plotë, ai hyri në korsitë e qarkullimit për automjetet që vinin nga drejtimi i kundërt, duke kthyer majtas në kryqëzim. Gjithashtu, në kundërshtim me Ligjin për sigurinë në komunikacionin rrugor, ai e drejtonte automjetin nën ndikimin e lëndëve narkotike”, thuhet në njoftimin e Prokurorisë.
Sipas Prokurorisë, mosrespektimi i rregullave të komunikacionit ka vënë në rrezik sigurinë publike dhe jetën e qytetarëve.
“Duke mos iu përmbajtur rregullave, i dyshuari me vetëdije e rrezikoi komunikacionin publik dhe vuri në rrezik jetën e njerëzve. Me pjesën e përparme të veturës ai goditi një motoçikletë BMW, ndërsa në pjesën e pasme të automjetit të tij u përplas një motoçikletë Honda HDV, të cilat vinin nga drejtimi i kundërt dhe lëviznin paralelisht. Si pasojë e forcës së goditjes, drejtuesi i motoçikletës BMW pësoi lëndime të rënda trupore nga të cilat ndërroi jetë”, thuhet në njoftim.
Duke vlerësuar se ekziston rreziku i arratisjes, ndikimit mbi dëshmitarët ose përsëritjes së veprës, prokurori publik i ka propozuar gjyqtarit të procedurës paraprake në Gjykatën Themelore Penale Shkup caktimin e masës së paraburgimit për të dyshuarin.
