Tetë të vdekur dhe 41 të lënduar nga zjarri në një kompleks tregtar pranë Teheranit

Të paktën tetë persona humbën jetën dhe 41 të tjerë u lënduan nga një zjarr në kompleksin tregtar Arghavan në Andisheh, në perëndim të kryeqytetit iranian Teheran, raportoi sot media lokale, transmeton Anadolu.

Guvernatori i rrethit Shahriar tha se viktimat humbën jetën nga zjarri që përfshiu kompleksin të martën, tha agjencia gjysmëzyrtare Fars.

Të martën, drejtuesi i Departamentit të Zjarrfikësve në Andisheh tha se të gjithë personat e bllokuar nga flakët dhe tymi ishin evakuuar në mënyrë të sigurt dhe ndërtesa ishte zbrazur plotësisht.

Sipas zyrtarit, përhapja e shpejtë e zjarrit u shkaktua nga fasada kompozite e ndërtesës, e cila shkaktoi që flakët të përhapeshin me shpejtësi në pjesën e jashtme.

Shkaku i zjarrit mbetet nën hetim.