Izet Mexhiti: 2 Maji, simbol i qëndresës dhe shpalljes së Karadakut Zonë e Lirë
Kryetari i Komunës së Çairit, Izet Mexhiti ka përkujtuar 2 Majin si një nga momentet më domethënëse të historisë, duke e cilësuar si ditën kur Karadaku u shpall Zonë e Lirë, simbol i qëndresës dhe vendosmërisë për liri.
Në një reagim publik, Mexhiti tha se ajo periudhë ishte e mbushur me sfida, por edhe me guxim të madh të njerëzve që nuk u dorëzuan përballë vështirësive.
“2 Maji mbetet një nga momentet më domethënëse të historisë sonë, dita kur Karadaku u shpall Zonë e Lirë, si simbol i qëndresës dhe vendosmërisë për liri”, deklaroi Mexhiti.
Ai theksoi se sakrificat e asaj kohe hapën një kapitull të ri shprese dhe dinjiteti për vendin.
“Nëpërmjet sakrificës së tyre u hap një kapitull i ri shprese dhe dinjiteti për këtë vend”, u shpreh ai.
Mexhiti shtoi se kjo ditë duhet të kujtohet me respekt dhe mirënjohje për të gjithë ata që kontribuuan në atë periudhë.
“Sot e kujtojmë këtë ditë me respekt dhe mirënjohje për të gjithë ata që kontribuuan në atë rrugëtim, duke na lënë trashëgimi lirinë që e gëzojmë sot. Lavdi dhe nder për të gjithë të rënët dhe përjetësisht respekt për historinë tonë”, theksoi ai.
