Përmbyset varka me pelegrinë në Indi, të paktën 10 viktima

Të paktën 10 persona humbën jetën dhe disa të tjerë mbeten të zhdukur pasi një varkë që mbante pelegrinë u përmbys pas një përplasjeje me një urë në Indinë veriore, thanë sot zyrtarët, transmeton Anadolu.

Incidenti ndodhi rreth orës 15:15 në lumin Yamuna në distriktin Mathura të Uttar Pradesh, u tha gazetarëve Shailesh Kumar Pandey, një zyrtar i lartë i policisë lokale.

Varka që mbante rreth 25 deri në 27 persona, u përmbys pasi goditi urën, sipas informacioneve paraprake. Autoritetet kanë gjetur 10 trupa deri më tani, tha Pandey.

Operacionet e shpëtimit janë duke vazhduar për të gjetur ata që janë ende të zhdukur.

Transmetuesi lokal “India Today” raportoi se varka mbante pelegrinë.

Kryeministri Narendra Modi tha se është “thellësisht i pikëlluar” nga incidenti.

“Administrata lokale po ndihmon të prekurit”, tha Modi në platformën amerikane të mediave sociale X.