Irani: Ngushtica e Hormuzit mbetet e hapur për botën, por e mbyllur për armiqtë e popullit iranian
Irani tha se Ngushtica e Hormuzit do të mbetet e hapur për transportin global detar, por “e mbyllur” për armiqtë e tij dhe bazat e tyre rajonale, transmeton Anadolu.
Ali Akbar Velayati, këshilltar i udhëheqësit suprem iranian, tha në një deklaratë në kompaninë amerikane të mediave sociale X se rezultati i luftës do të përcaktohet nga strategjia e Iranit dhe jo nga ajo që ai e përshkroi si “iluzionet” e kundërshtarëve të tij.
“Ngushtica e Hormuzit është e hapur për botën, por do të mbetet e mbyllur për armiqtë e popullit iranian dhe bazat e tyre në rajon”, tha ai. Velayati shtoi se lufta do të përfundojë sipas kushteve të Iranit.
“Lufta do të përfundojë me strategjinë dhe autoritetin e Iranit, jo me dehjen dhe iluzionet e agresorëve”, tha ai.
Komentet e Velayatit erdhën disa orë pasi presidenti amerikan Donald Trump tha në një fjalim televiziv nga Shtëpia e Bardhë se Irani kishte “shumë pak” lëshues raketash të mbetura dhe se aftësia e tij për të lëshuar raketa dhe dronë ishte “kufizuar në mënyrë dramatike”.
Trumpi tha se pret që lufta të vazhdojë për dy deri në tre javë të tjera, por beson se konflikti po i afrohet fundit.
Teherani ka ruajtur kontrollin efektiv të Ngushticës së Hormuzit, një rrugë ujore kritike për furnizimin me energji të vendeve aziatike, duke lejuar anijet e atyre vendeve që Irani i quan vende mike.
Tensionet në rajon janë përshkallëzuar që kur Izraeli dhe SHBA-ja nisën ofensivë të përbashkët kundër Iranit më 28 shkurt, duke rezultuar në më shumë se 1.340 vdekje, përfshirë ish-udhëheqësin suprem Ali Khamenei.
Irani është hakmarrë me sulme me dronë dhe raketa që synojnë Izraelin, Jordaninë, Irakun dhe vendet e Gjirit që strehojnë asete ushtarake amerikane, duke shkaktuar viktima dhe dëme në infrastrukturë ndërsa kanë prishur tregjet dhe aviacionin global.
