Kolonët e paligjshëm plagosin një zyrtar lokal palestinez në Bregun Perëndimor
Një zyrtar lokal palestinez është plagosur mbrëmë pasi një grup kolonësh izraelitë të paligjshëm sulmoi një fshat në veri të Bregut Perëndimor të pushtuar, raporton Anadolu.
Burime lokale për Anadolu thanë se rreth 30 kolonë të paligjshëm hynë në fshatin Al-Malih dhe sulmuan fizikisht kryetarin e këshillit, Mahdi Daraghmeh, i cili pati nevojë për trajtim mjekësor. Ai u dërgua në një qendër shëndetësore aty pranë, sipas burimeve.
Gjatë sulmit, kolonët gjithashtu vandalizuan prona palestineze dhe u vunë flakën automjeteve. Forcat izraelite hynë më vonë në fshat pas incidentit. Sulmi ndodh në një periudhë tensionesh të shtuara në Bregun Perëndimor të pushtuar, ku komunitetet palestineze janë përballur me rritje të dhunës nga kolonët e paligjshëm muajt e fundit.
Javën e kaluar, qeveria izraelite miratoi masa që synojnë riformësimin e kornizës ligjore dhe civile në Bregun Perëndimor, hapa që palestinezët i konsiderojnë si përpjekje për të thelluar kontrollin izraelit mbi territorin.
Izraeli ka intensifikuar operacionet në Bregun Perëndimor, përfshirë në Kudsin Lindor, që prej nisjes së fushatës ushtarake në Gaza në tetor të vitit 2023. Palestinezët e shohin përshkallëzimin, përfshirë vrasjet, arrestimet, zhvendosjet dhe zgjerimin e vendbanimeve, si një hap drejt aneksimit formal të territorit.
Në një opinion të rëndësishëm në korrik të vitit 2024, Gjykata Ndërkombëtare e Drejtësisë e shpalli të paligjshëm pushtimin izraelit në territorin palestinez dhe bëri thirrje për evakuimin e të gjitha vendbanimeve në Bregun Perëndimor dhe Kudsin Lindor.
