Vendet evropiane dënojnë masat e Izraelit për zgjerimin e kontrollit mbi Bregun Perëndimor

Vendet evropiane dënuan masat e fundit të miratuara nga Izraeli që thellojnë kontrollin e tij në Bregun Perëndimor të pushtuar, transmeton Anadolu.

Bashkimi Evropian, së bashku me Francën, Gjermaninë, Mbretërinë e Bashkuar, Spanjën dhe Belgjikën, shprehën keqardhje për miratimin nga kabineti i sigurisë izraelite të dielën të masave që synojnë ndryshimin e kuadrit ligjor dhe civil në territor për të forcuar kontrollin izraelit.

Vendimet përfshijnë shfuqizimin e një ligji që ndalonte shitjen e tokës në Bregun Perëndimor tek individë privatë izraelitë, hapjen e të dhënave të pronësisë së tokës dhe zhvendosjen e autoritetit për lejet e ndërtimit në një bllok vendbanimesh pranë Hebronit nga një komunë palestineze në administratën civile të Izraelit, sipas mediave izraelite.

“Bashkimi Evropian dënon vendimet e fundit të kabinetit të sigurisë të Izraelit për të zgjeruar kontrollin izraelit në Bregun Perëndimor. Ky veprim është një hap tjetër në drejtimin e gabuar, ndërsa i gjithë komuniteti ndërkombëtar po bën përpjekje për të zbatuar fazën e dytë të planit gjithëpërfshirës për Gazën”, tha zëdhënësi Anouar El Anouni në konferencën për shtyp të Komisionit Evropian.

Zëdhënësja e Ministrisë së Jashtme gjermane tha për Agjencinë Anadolu se njoftimi “shkel detyrimet e Izraelit sipas ligjit ndërkombëtar dhe përfaqëson një pengesë të mëtejshme në rrugën drejt një zgjidhjeje me dy shtete”.

“Mbretëria e Bashkuar ka qenë e qartë: çdo përpjekje e njëanshme për të ndryshuar përbërjen gjeografike ose demografike të Palestinës është tërësisht e papranueshme dhe do të ishte në kundërshtim me të drejtën ndërkombëtare. Ne i bëjmë thirrje Izraelit që t’i anulojë këto vendime menjëherë”, tha në një deklaratë një zëdhënës i Zyrës së Jashtme, Komonuelthit dhe Zhvillimit.

Ministria e Jashtme e Spanjës tha gjithashtu në një deklaratë se vendimet izraelite ndryshojnë status quo-në në Bregun Perëndimor dhe minojnë unitetin territorial dhe politik të një shteti palestinez bazuar në kufijtë e vitit 1967, ndërsa i bëri thirrje Tel Avivit të përmbushë detyrimet e tij.

Ministria e Jashtme e Francës tha se “në një kohë kur përpjekjet ndërkombëtare janë të përqendruara në zbatimin e fazës së dytë të planit të paqes në Gaza, këto vendime minojnë përpjekjet e vazhdueshme për paqe dhe rrezikojnë të nxisin tensionet”, duke theksuar se masat përbëjnë “një goditje serioze për zgjidhjen me dy shtete”.

Ministria e Jashtme Zvicerane tha në platformën e kompanisë amerikane të mediave sociale X se dënon fuqimisht masat e miratuara së fundmi, duke theksuar se “aktivitetet izraelite të vendbanimeve janë të paligjshme sipas të drejtës ndërkombëtare”.

“Unë dënoj vendimet e fundit të Izraelit që zgjerojnë kontrollin mbi Bregun Perëndimor të pushtuar”, tha ministri i Jashtëm belg, Maxime Prevot, në X, duke shtuar se masa të tilla janë “në kundërshtim me të drejtën ndërkombëtare, Rezolutën 2334 të Këshillit të Sigurimit të OKB-së dhe mendimin këshillimor të Gjykatës Ndërkombëtare të Drejtësisë”.

Ministri i Jashtëm holandez, David van Weel, i kërkoi Izraelit të mos zbatojë vendimet e tij të fundit, të cilat “rrisin tensionet në një moment të përpjekjeve të pashembullta ndërkombëtare për paqe dhe stabilitet në rajon”.