Policia holandeze arreston 4 persona për sulmin ndaj ambasadës iraniane
Katër persona u arrestuan të martën pas një sulmi ndaj Ambasadës së Iranit në Hagë, transmeton Anadolu.
Incidenti ndodhi në lagjen Scheveningen, ku disa individë shënjestruan ndërtesën e ambasadës dhe u përpoqën të ngjiteshin mbi gardhin përreth saj, sipas autoriteteve lokale, raportoi agjencia holandeze e lajmeve NOS.
Policia tha se pati pak ose aspak dëme në ndërtesë dhe nuk u raportuan të lënduar.
Të dyshuarit u dërguan në një stacion policie për t’u marrë në pyetje. Identitetet e tyre nuk janë zbuluar.
Irani ka përjetuar protesta të gjera antiqeveritare që nga muaji i kaluar, të nxitura nga përkeqësimi i rëndë ekonomik dhe një rënie historike e monedhës kombëtare.
Zyrtarët qeveritarë kanë akuzuar SHBA-në dhe Izraelin për mbështetjen e “trazirave” dhe “terrorizmit”.
Nuk ka shifra zyrtare të viktimave, por Agjencia e Lajmeve të Aktivistëve të të Drejtave të Njeriut (HRANA), një grup i të drejtave me seli në SHBA, vlerëson se numri i të vdekurve ka arritur në më shumë se 2.500, përfshirë forcat e sigurisë dhe protestuesit, me mbi 1.000 të plagosur.
HRANA raportoi gjithashtu se të paktën 10.721 persona janë ndaluar në 585 vende në të gjithë vendin, duke përfshirë 187 qytete në të 31 provincat.
Misionet diplomatike iraniane në disa vende janë shënjestruar gjithashtu ditët e fundit në lidhje me protestat. Aktivistët hoqën flamujt iranianë nga ambasadat në Londër dhe Madrid, ndërsa në kryeqytetin e Kanadasë, Otavë, materiale proteste dhe flamuj u varën në ambasadën iraniane.
