Berberi i Gazës i shërben komunitetit në një hapësirë të improvizuar mbi rrënojat e shtëpisë së tij
Mes peizazhit gri të lagjes Sheikh Radwan në qytetin e Gazës, Bassem al-Ghafari, me profesion berber, ka gjetur një mënyrë për të rikthyer jetën e tij të vjetër, duke ngritur hapësirë pune të improvizuar mbi rrënojat e asaj që dikur ishte shtëpia dhe vendi i tij i punës, raporton Anadolu.
Pasi u zhvendos disa herë gjatë konfliktit, Al-Ghafari u kthye për të gjetur shtëpinë e tij të shndërruar në rrënoja.
Në rrënojat mbi vendit ku ishte dyqani i tij profesional, ai vendosi një karrige nën tavanin e çarë që ende rrezikon të shembet, duke përdorur çfarëdo pajisjesh që arriti të shpëtojë nga rrënojat për t’i shërbyer komunitetit me profesionin e tij.
Për Al-Ghafarin, puna është një ekuilibër delikat midis mbijetesës dhe refuzimit për të hequr dorë nga normaliteti. “Kam dy vajza të vogla dhe ato kanë nevojë për ushqim çdo ditë. Nëse punoj çdo ditë, të paktën mund t’u siguroj atyre atë ditë”, tha Al-Ghafari.
Pajisjet që ai përdor janë nxjerrë të gjitha me dorë nga rrënojat e dyqanit të tij të shkatërruar. Pavarësisht mjedisit të pasigurt, fqinjët e tij vazhdojnë ta vizitojnë, duke gjetur një çast të shkurtër dinjiteti dhe rutine mes shkatërrimit të përhapur.
Qindra mijëra palestinezë në Rripin e Gazës jetojnë në tenda dhe strehë të përkohshme, mes mungesës së theksuar të furnizimeve për strehim të sigurt, pasi lufta 2-vjeçare e Izraelit ka shkatërruar zona të tëra banimi dhe ka detyruar zhvendosje masive.
Shumica e tendave nuk kanë masa bazë të sigurisë, duke i bërë të cenueshme ndaj zjarreve, veçanërisht pasi njerëzit mbështeten në mjete primitive për ngrohje dhe gatim për shkak të ndërprerjeve të energjisë dhe mungesës së rëndë të karburantit.
Që nga tetori i vitit 2023, ushtria izraelite në Gaza ka vrarë më shumë se 71 mijë persona, kryesisht gra dhe fëmijë si dhe ka plagosur mbi 171 mijë të tjerë.
