Policia australiane për sulmin në Bondi Beach: Dy autorët vepruan të vetëm
Dy autorët e sulmit vdekjeprurës në Bondi Beach të Sidneit, në të cilin vdiqën 15 persona, dyshohet se kanë vepruar vetëm, pa ndihmë të jashtme dhe pa qenë të lidhur me një organizatë terroriste, njoftoi Policia Federale Australiane .
Në një konferencë për shtyp sot, Komisionerja e Policisë Federale Australiane, Chrissy Barrett, tha se, bazuar në provat e deritanishme të hetimit, dy autorët nuk kishin marrë asnjë mbështetje të jashtme dhe as nuk ishin pjesë e një rrjeti të organizuar terrorist.
“Këta individë duket se kanë vepruar vetëm”, tha ajo, duke vënë në dukje se nuk kishte prova të koordinimit me palë të treta ose udhëzime nga një organizatë terroriste, pavarësisht seriozitetit dhe shkallës së sulmit.
Sulmi ndodhi në Bondi Beach, një nga vendet më të ngarkuara në Sydney, duke shkaktuar tronditje në shoqërinë australiane. Pesëmbëdhjetë persona humbën jetën, ndërsa disa të tjerë u plagosën, në një incident që ndodhi në mes të një feste hebraike, e cila fillimisht kishte intensifikuar shqetësimet për një motiv të mundshëm fetar ose terrorist.
Chrissy Barrett sqaroi se, megjithëse koha e sulmit u shqyrtua nga afër nga autoritetet, deri më tani nuk ka dalë asnjë provë që të tregojë se autorët e krimit kishin motive ideologjike ose fetare të lidhura me terrorizmin e organizuar. Hetimet tani po përqendrohen në profilin personal të autorëve të krimit, historinë e tyre dhe rrethanat që çuan në sulm.
