Kuvendi ngjyroset portokalli në mbështetje të fushatës kundër dhunës me bazë gjinore, Gashi: Zero tolerancë ndaj dhunës
Kuvendi i Kosovës iu bashkua sonte fushatës botërore “16 Ditët e Aktivizmit kundër Dhunës me Bazë Gjinore”, duke u ndriçuar me ngjyrën portokalli – simbol i solidaritetit dhe angazhimit për një shoqëri pa dhunë ndaj grave dhe vajzave. Iniciativa u realizua përmes Programit për Mbështetje Parlamentare.
Kryetari i Kuvendit, z. Gashi, theksoi se ndriçimi portokalli nuk është vetëm një gjest simbolik, por një mesazh i fuqishëm se institucioni më i lartë përfaqësues i vendit qëndron në anën e çdo gruaje dhe vajze dhe nuk toleron dhunë në asnjë rrethanë.
“Le të shërbejë drita portokalli si thirrje për reflektim, ndërkaq bashkë me këtë dritë të ndizet shpresa për një shoqëri ku çdo grua dhe vajzë jeton pa frikë, e respektuar dhe e mbrojtur,” deklaroi kryeparlamentari.
Edhe në gjuhën maqedonase u përcoll i njëjti mesazh i përkushtimit institucional, duke nënvizuar rolin e Kuvendit si mbështetës i fuqishëm i të drejtave të grave dhe luftës kundër dhunës me bazë gjinore.
Ndriçimi portokalli, që tashmë është bërë traditë në shumë vende të botës, synon të rrisë vetëdijen publike dhe të nxisë veprime konkrete kundër çdo forme të dhunës ndaj grave dhe vajzave.
