KRRE javën e ardhshme do të marrë vendim për tarifat e transmitimit dhe distribuimit të energjisë elektrike

Komisioni Rregullator për Energjetikë javën e ardhshme do të marrë vendime për tarifat e transmitimit dhe distribuimit të energjisë elektrike, si dhe për çmimin e operatorit të tregut të energjisë elektrike. Kryetari i KRRE-së, Marko Bislimoski, siguron se nuk do të shkaktohet rritje e çmimit të rrymës për amvisëritë.

“Pas marrjes së këtyre vendimeve, ‘EVN Home’ si furnizues universal do të bëjë llogaritje në përputhje me Ligjin për Energjetikë dhe do ta dorëzojë në KRRE për shqyrtim, në mënyrë që të verifikohet nëse është në pajtim me sistemin tarifor që është në fuqi. Në këtë sistem tarifor kemi mënyrë tarifimi me blloqe, të futur në vitin 2022, e cila kontribuoi në uljen e konsumit të amvisërive dhe dërgoi sinjal te konsumatorët se konsumimi joracional sjell fatura më të larta të energjisë elektrike”, theksoi Bislimoski.

Duke iu përgjigjur pyetjeve të gazetarëve, më herët sot kryeministri Hristijan Mickoski deklaroi se për rritjen ose uljen e çmimit të energjisë elektrike do të vendosë rregullatori. Por shtoi se Qeveria do të vazhdojë me subvencionimin e faturave të rrymës për amvisëritë dhe për të gjithë që janë në tregun e rregulluar.

Aktualisht, çmimi tregtar i energjisë elektrike është rreth 100 euro për megavat/orë, ndërsa EMV e shet rrymën për amvisëritë me 62 euro për megavat/orë. Kjo diferencë mes çmimit tregtar dhe atij rregullator deri tani është mbuluar me subvencione nga buxheti. Tenderi i ri vjetor, i shpallur për herë të parë për gjithë vitin kalendarik, do të tregojë nëse prodhuesi shtetëror mund të ofrojë çmim që mbetet brenda këtyre kufijve apo do të kërkojë korrigjimin e tarifës përfundimtare.