Gjykata Kushtetuese do ta ketë fjalën përfundimtare për rritjen lineare të pensioneve

Gjykata Kushtetuese e ka fjalën përfundimtare nëse do të shfuqizohet apo jo rritja lineare e pensioneve për 1.000 denarë që ka filluar të paguhet prej shtatorit të këtij viti dhe 1.000 denarëve të tjera të cilat planifikohen që të paguhen prej marsit të vitit të ardhshëm. Procedura është hapur me shumicë votash të gjykatësve kushtetues pas dyshimeve se kjo rritje është e paligjshme dhe mund të prodhojë diskriminim ndaj pensionistëve që marrin pensione më të larta, pasi rritja është bërë me vlerë të përgjithshme dhe jo me përllogaritje në përqindje. Procedura, aktualisht ndodhet në fazën e dytë, ku shqyrtohen mendimet nga miratuesi dhe propozuesi i ndryshimeve ligjore për këtë rritje lineare, ndërsa sipas Aktit të Gjykatës Kushtetuese, pasi të mbarojë kjo fazë, lënda do të vendoset në seancë, ku duhet të miratohet sërish me shumicë votash nga gjykatësit kushtetues.

Aktualisht, Kushtetuesja numëron 8 gjykatës, ndërsa për të miratuar vendim duhet të votojnë së paku 5. Ka mundësi që edhe të mos ketë vendim, nëse gjykatësit votojnë 4 “për” dhe 4 “kundër”.
Ndërkohë, kryeministri Hristijan Mickoski, i cili dje u demantua nga kushtetuesja për deklaratën se gjykatësja raportuese e lëndës Dobrilla Kacarska ka miratuar vendimin, sot uron që të ketë qenë gabim.

“A do të ndodh ajo, do të shohim së shpejti. Shumë shpejtë do të marrim përgjigje nëse kam qenë në të drejtë dhe nëse informacioni ka qenë i saktë ose jo. Unë do të doja të mos jem në të drejtë. Ja unë dëshiroj të mos kem të drejtë. Por, çfarë nëse kam të drejtë. Atëherë kush bën kaos dhe kush me vetëdije godet në standardin e pensionistëve. Qeveria me ato masa dëshironte ta përmirësojë standardin e mbi 350 mijë pensionistëve. Dikush tjetër ka qëllime të tjera”, tha Hristijan Mickoski, Kryeministër.

Nga ana tjetër, opozita thekson që kryeministri është përgjegjës për kaosin me pensionet pasi i ka gënjyer pensionistët.

“Qeveria e Mickoskit krijoi kaos total me pagesën e pensioneve, përveç që i gënjeu pensionistët tani tenton që fajin ta hedh te tjetër kush. Nëse pushteti i DPMNE-së ka dorëzuar në Kuvend ligj i cili është antikushtetues, nuk mundet që dikush tjetër të jetë fajtor përveç atyre që e kanë dorëzuar”, njoftojnë nga LSDM.

Ndryshimet ligjore për rritje lineare të pensioneve në vlerë prej 1 mijë denarë në shtator dhe 1 mijë denarë në mars, kaluan më 24 korrik të këtij viti në Kuvend. Për këto ndryshime, krahas deputetëve të shumicës, votuan edhe deputetët e opozitares LSDM, pavarësisht kritikave që i kishin. Nga Kushtetuesja, dje sqaruan se temë e çështjes, nuk janë rritjet paraprake lineare të pensioneve nga 2.500 denarë, respektivisht 5.000 denarë. /Alsat.mk