Diplomacia në krizë: Izraeli akuzohet për gjuhë urrejtjeje ndaj zyrtares së OKB-së

Ambasadori i Izraelit në Kombet e Bashkuara po përballet me thirrje në rritje që të tërheqë dhe të kërkojë falje për sulmet personale që ka bërë ndaj Francesca Albanese, raportueses speciale të OKB-së për të drejtat e njeriut në territoret palestineze të pushtuara.

Gjatë një fjale në selinë e OKB-së këtë javë, diplomati izraelit Danny Danon e quajti Albanesen – e cila ka qenë një nga zërat më të fortë që e ka cilësuar luftën e Izraelit në Gaza si gjenocid – një “shtrigë”.

“I bëj thirrje Izraelit të tërhiqet dhe të kërkojë falje për këtë sulm sexist dhe plot urrejtje ndaj znj. Albanese,” shkroi në një postim në rrjetet sociale Ben Saul, një tjetër raportues special i OKB-së. “Gjuha e tillë është plotësisht e papranueshme në diplomacinë ndërkombëtare.”

Edhe zëdhënësi i Sekretarit të Përgjithshëm të OKB-së, António Guterres, Stephane Dujarric, u pyet dje për komentet e ambasadorit izraelit, duke i përshkruar ato si “tronditëse, për të thënë minimumin”.

“Ne kemi theksuar gjithmonë se raportuesit specialë janë një pjesë e rëndësishme e mekanizmit ndërkombëtar të të drejtave të njeriut,” tha Dujarric. “Ata janë zyrtarë të OKB-së gjatë kryerjes së punës së tyre dhe duhet të respektohen – si ligjërisht, ashtu edhe në aspektin verbal.” /Al Jazeera/