Qeveria spanjolle miraton blerjen e avionit turk HURJET

Qeveria spanjolle ka miratuar blerjen e HURJET, avionit reaktiv të parë kombëtar për trajnime dhe sulme të lehta të Turqisë, të zhvilluar nga Industria Hapësinore Turke (TUSAS), transmeton Anadolu.

“Këshilli i Ministrave miratoi kontratën për blerjen e një Sistemi të Integruar Trajnimi (ITS-C) për avionë luftarakë dhe sulmues, për të zëvendësuar avionët ekzistues AE.09 (F5), me një vlerë prej 3.12 miliardë eurosh”, thuhet në vendimin e marrë në mbledhjen e rregullt javore të Këshillit të Ministrave

Ndër të tjera, në vendimin e Këshillit të Ministrave thuhet se Spanja nga Turqia do të blejë 45 avionë HURJET.

“Domosdoshmëria e kësaj kontrate do të sigurojë që Forcat Ajrore dhe Forcat Hapësinore të përmbushin kërkesat e nevojshme për përditësimin, zgjerimin dhe rinovimin e aftësive në trajnimin e pilotëve të specializuar në avionë luftarakë dhe sulmues. Ky sistem (ITS-C) synon të sigurojë përgatitje të përshtatshme për operacione në skenarë të rinj dhe kompleks të sigurisë. Kontrata do të jetë e vlefshme nga data e nënshkrimit deri më 30 nëntor 2035, pa mundësi zgjatjeje”, thuhet më tej.

Dorëzimet pritet të fillojnë në vitin 2028, me avionin e parë të dorëzimit që do të përdoret në kursin e trajnimit 2029/2030 dhe HURJET-ët pritet të shërbejnë për të paktën 30 vjet.

Nga ana tjetër, faqja e internetit e lajmeve të mbrojtjes ‘Infodefensa‘ ka theksuar se “Airbus do të jetë koordinatori kombëtar dhe forca lëvizëse e sektorit të aviacionit në këtë projekt”.

“Pesëmbëdhjetë kompani të mëdha hapësinore në Spanjë, duke përfshirë Ona, Aciturri, Aernnova, Aertec, Airtificial, Amper, Centum, CESA, CLUE, GMV, Grabysur, Indra, Grupo Oesia, Orbital dhe Sener, do të marrin pjesë gjithashtu”, thuhet më tej.

Raportohet se në kuadër të programit do të sigurohet një kredi prej 1.04 miliardë eurosh nga Ministria e Industrisë e Spanje4s gjatë pesë viteve.

“Sipas kalendarit të planifikuar, dërgesat pritet të fillojnë në vitin 2028 dhe avioni i parë do të vendoset në platformë dhe do të fillojë trajnimin për kursin e trajnimit 2029/2030. Avionët e rinj stërvitorë të bazuar në Hurjet pritet të shërbejnë për të paktën 30 vjet”, tha faqja e lajmeve.

Gjithashtu edhe faqja e internetit ‘Actualidadaeroespecial’ njoftoi vendimin e marrë nga Këshilli i Ministrave, duke bërë të ditur se: “Marrëveshja krahas eksperiencës së Airbus në projektimin, prodhimin, integrimin e sistemit, mbështetjen në shërbim dhe trajnimin, do të përfitojë edhe nga dizajni inovativ i HURJET, i cili është një avion trajnimi supersonik, me një motor, me dy vende dhe aftësi të përparuara të Industrisë Hapësinore Turke. Ky model do të formojë themelin teknologjik mbi të cilin do të ndërtohet sistemi i ardhshëm i trajnimit”.