Zekirija Shaini i cili u plagos dje në Kumanovë, është liruar për trajtim shtëpiak
Mjeku dhe bartësi i listës së këshilltarëve të BDI-së në Komunën e Likovës, Zekirija Shaini, i cili u plagos dje në një incident me armë në qendër të Kumanovës, u lirua sot nga Klinika Universitare për Kirurgji Plastike në Shkup, për trajtim në shtëpi.
Drejtoresha e Klinikës, Jasmina Gjorgievska-Pavlovska, konfirmoi në një deklaratë për MIA-n se pacienti ndihej mirë.
“Pacienti është në gjendje të mirë të përgjithshme. Pasi u trajtuan plagët, ai u lirua për trajtim në shtëpi”, tha Gjorgievska-Pavlovska.
Ministria e Shëndetësisë reagoi dje pasdite përmes një deklarate se e priti me shqetësim lajmin për sulmin me armë në Kumanovë, në të cilin u plagos kolegu i tyre, Dr. Shaini.
“Ne informojmë publikun se lëndimet nuk janë kërcënuese për jetën dhe se mjeku është në gjendje të qëndrueshme dhe po shërohet. Do t’i ofrohet mbështetje e plotë mjekut gjatë shërimit dhe rehabilitimit të tij. Ministria dënon kategorikisht çdo dhunë ndaj punonjësve të kujdesit shëndetësor dhe konfirmon se siguria e tyre është përparësi. Ne do të punojmë për të përmirësuar masat për të mbrojtur personelin e kujdesit shëndetësor, përmes bashkëpunimit me institucionet e kujdesit shëndetësor dhe autoritetet lokale”, theksoi dje Ministria e Shëndetësisë.
Edhe pse Ministria e Brendshme raportoi dje se disa persona po qëllonin nga një automjet në lëvizje, pamjet e kamerave të sigurisë tregojnë se kjo nuk është e vërtetë. Sipas pamjeve të publikuara, Zekirija Shaini u qëllua nga një person që ecte në këmbë, ndërsa Shaini në një automjet në lëvizje.
Shaini u qëllua katër herë, në gjurin e djathtë dhe në parakrahun e majtë. Ai u dërgua fillimisht në spitalin e Kumanovës, dhe më pas në klinikat e Shkupit, ku iu dha ndihma mjekësore. Sipas informacioneve, ai është në gjendje të qëndrueshme dhe jashtë rrezikut për jetën.
