Kasami prezanton projektin për kanalizim atmosferik në Tetovë, investim mbi 96 milionë denarë

Kryetari i Komunës së Tetovës, Bilall Kasami, ka prezantuar sot një nga projektet më të mëdha infrastrukturore për qytetin – ndërtimin e kanalizimit atmosferik në disa segmente kyçe.

“Sot prezantova projektin e madh të kanalizimit atmosferik që do ta përmirësojë dukshëm infrastrukturën, sigurinë dhe mirëqenien e qytetarëve,” tha Kasami.

Ai njoftoi se investimi kap vlerën e mbi 96 milionë denarëve dhe përfshin:

• 2,5 kilometra kanalizim atmosferik në tre segmente (Lagjja Jashtë Vardarit, kompleksi Teteks dhe Blloku Urban nr.59), me një kosto prej 52 milionë denarësh.

• 1,150 metra kanalizim atmosferik në bulevardin VS Bato, investim mbi 25 milionë denarë.

• 950 metra kolektor në lagjen Dardania, që do të kushtojë 19,5 milionë denarë.

“Pra, gati 5 kilometra infrastrukturë kanalizimi gjithsej, mbi 96 milionë denarë investim në rrjetin e kanalizimit për Tetovën,” theksoi kryetari.

Kasami shtoi se qyteti është në një fazë të re zhvillimi:
“Tetova do të vazhdojë të zhvillohet në çdo segment. Koha e stagnimit ka kaluar. Tetova po transformohet dhe ky zhvillim do të vazhdojë me Kapitullin e Dytë – edhe më shumë, edhe më mirë, edhe më fuqishëm.”