Zyra Mediale: Mbi 900 mijë palestinezë në qytetin e Gazës refuzojnë zhvendosjen me forcë
Më shumë se 900 mijë palestinezë në qytetin e Gazës po refuzojnë të largohen nga shtëpitë e tyre pavarësisht bombardimeve të pandërprera izraelite që synojnë zhvendosjen me forcë të banorëve, thanë autoritetet lokale, transmeton Anadolu.
Në një deklaratë, Zyra Mediale e Qeverisë së Gazës tha se banorët po “i përmbahen fort të drejtës së tyre për të qëndruar” dhe po i hedhin poshtë kategorikisht përpjekjet izraelite për t’i dëbuar në jug, edhe pse lagje të tëra janë nën zjarr të rëndë.
Ajo akuzoi ushtrinë izraelite për kryerjen e një “fushate sistematike mashtrimi” duke reklamuar tenda, ndihma dhe shërbime humanitare që “nuk ekzistojnë në terren”. Pretendime të tilla, tha ajo, synojnë të detyrojnë civilët të braktisin shtëpitë dhe lagjet e tyre.
Zyra shtoi se ekipet qeveritare kanë dokumentuar një rritje të familjeve që lëvizin në jug në javët e fundit, duke ia atribuuar këtë “krimeve barbare” të Izraelit dhe operacioneve ushtarake të intensifikuara.
Izraeli nisi operacionin “Karrocat e Gideonit 2” në fillim të këtij muaji, duke synuar pushtimin e plotë të qytetit të Gazës. Gati një milion palestinezë, shumica e të cilëve të zhvendosur nga pjesë të tjera të enklavës, mbeten të bllokuar nën bombardime të pandërprera.
Ushtria izraelite ka vrarë më shumë se 65.300 palestinezë në Rripin e Gazës që nga tetori i vitit 2023, shumica prej tyre gra dhe fëmijë. Bombardimet intensive e kanë bërë enklavën të pabanueshme dhe kanë çuar në uri dhe përhapjen e sëmundjeve.
