Vendet arabe bëjnë thirrje për ndalimin e menjëhershëm të gjenocidit të vazhdueshëm të Izraelit në Gaza
Vendet arabe kanë bërë thirrje për një “ndërprerje të menjëhershme” të luftës gjenocidale gati dyvjeçare të Izraelit në Rripin e Gazës, transmeton Anadolu.
Princi i Kurorës së Kuvajtit, Sabah Khalid al-Hamad al-Sabah, iu drejtua vendeve të Këshillit të Bashkëpunimit të Gjirit (GCC) në një seancë publike të thirrur nga Këshilli i Sigurimit i Kombeve të Bashkuara (KS-OKB) për të diskutuar situatën në Lindjen e Mesme, përfshirë çështjen palestineze.
Princi i Kurorës Sabah deklaroi se seanca u zhvillua në një kohë kur tragjedia në Gaza ka vazhduar për gati dy vjet, me popullin e pambrojtur palestinez që përballet me vuajtjet më të tmerrshme, duke përfshirë një rrethim mbytës dhe të padrejtë, shkatërrim dhe vdekjen e mbi 65.000 civilëve të pafajshëm, kryesisht gra dhe fëmijë.
Sabah theksoi se ngjarjet në Rripin e Gazës janë një shembull i gjallë i gjenocidit dhe spastrimit etnik, dhe një plagë e hapur që nuk mund të injorohet. Ai i bëri thirrje Këshillit të Sigurisë së OKB-së që të ndalojë menjëherë sulmet ndaj Gazës, të sigurojë akses urgjent në ndihmë humanitare dhe t’i përkthejë fjalët në veprime praktike për të mbrojtur civilët.
Përfaqësuesi i Përhershëm i Egjiptit në Kombet e Bashkuara (OKB), Osama Abdul Khalik, deklaroi se vendi i tij i jep përparësi shmangies së provokimeve të shumta të Izraelit, sepse beson në domosdoshmërinë e një armëpushimi në Rripin e Gazës.
Abdull Khalik theksoi qëndrimin kokëfortë të Izraelit në lidhje me vazhdimin e luftës në Gaza, duke theksuar se përfundimi i situatës katastrofike në Rripin e Gazës është bërë një domosdoshmëri absolute.
Përfaqësuesi i Përhershëm i Palestinës në OKB, Riyad Mansour, tha: “Palestinezët nuk janë qenie të përbuzshme. Ne meritojmë jetën, lirinë dhe dinjitetin. Mizoritë e kryera nga Izraeli kundër popullit tonë në Gaza nuk mund të justifikohen kurrë”.
Mansour, duke deklaruar se palestinezët dhe izraelitët nuk duhet të dënohen me luftë të përjetshme, tha: “Asnjë gjenocid, as uzurpim, as zhvendosje të detyruar, as kolonializëm, as aneksim, as pushtim. Çlironi Gazën, çlironi Palestinën, çlironi paqen.”
Sekretari i Përgjithshëm i Lidhjes Arabe, Ahmed Abu Gheit, duke folur në seancë, deklaroi: “Ajo që po ndodh në Gaza është e pashembullt në brutalitetin dhe barbarinë e saj, por qëllimi i tyre është i qartë: të shkatërrojnë shoqërinë palestineze dhe ta bëjnë të gjithë tokën e saj të pabanueshme, duke e detyruar popullsinë të largohet nga Rripi i Gazës”.
“Po them të qartën: dorëzimi ndaj këtij plani brutal dhe të çmendur do ta delegjitimojë ndjeshëm Këshillin dhe do ta dobësojë rolin e tij në ruajtjen e paqes dhe sigurisë ndërkombëtare. Ajo që po ndodh në Gaza nuk do të mbetet në Gaza”, tha Abu Gheit.
