Qyteti i Gazës ‘në prag të një kapitulli të ri të përgjakshëm’
Një numër civilësh u plagosën nga sulmi izraelit mbi kullën 12-katëshe Mushtaha dhe u transportuan në kompleksin spitalor al-Shifa për të marrë trajtim urgjent.
Shoku i fuqishëm i sulmit u përhap në gjithë zonën, duke shkaktuar kaos. Një numër tendash të improvizuara u prekën nga sulmi, çka sinjalizon një fazë të re të fushatës ushtarake izraelite.
Ushtria izraelite zakonisht përpiqet t’i tregojë komunitetit ndërkombëtar se po merr masa të jashtëzakonshme për të parandaluar dëmtimin e civilëve, por shkatërrimi që mbetet pas këtyre sulmeve është i gjithanshëm dhe rrëqethës, ndërsa familjet përpiqen të gjejnë ndonjë vend me ndjesi strehimi.
Shumë zona të qytetit të Gazës përmbajnë ndërtesa të larta, çka e bën gjithë qytetin një epiqendër aktive të sulmeve izraelite.
Dëshmitarë nga terreni thonë se qielli mbi qytetin e Gazës tani është i mbushur me dronë dhe avionë luftarakë që bombardojnë zonat e banuara, tendat e improvizuara dhe automjetet civile. Edhe zonat ku njerëzve u është thënë të largohen, mbeten nën mbikëqyrje shumë të rreptë të dronëve izraelitë.
Kritikë dhe ekspertë ligjorë thonë se shënjestrimi i ndërtesave të larta përbën një përshkallëzim të thellë të luftës urbane, duke rrezikuar jetën e qindra mijëra njerëzve që kërkojnë strehim pranë tyre.
Kështu, qyteti i Gazës gjendet vërtet në prag të një kapitulli të ri të përgjakshëm dhe të një fushate gjithnjë e më të ashpër izraelite, e cila do të shkatërrojë çfarë ka mbetur nga qendra urbane. /Al Jazeera/
