Ofensiva izraelite arrin “në zemër” të Gazës, vriten 7 fëmijë

Që nga mesnata, Izraeli ka goditur një numër çadrash të improvizuara, blloqe banesash dhe ndërtesa rezidenciale në qytetin e Gazës. Mes viktimave janë edhe shtatë fëmijë.

Ushtria izraelite thotë se tani kontrollon 40 për qind të qytetit të Gazës dhe po kalon në fazën e dytë të operacionit ushtarak, që do të shoqërohet me bombardime masive dhe urdhra për evakuim në masë.

Ajo po përpiqet gradualisht të marrë nën kontroll pjesët e mbetura të qytetit dhe tashmë po operon në zemër të tij. Ushtria po synon të shkatërrojë lagjen Sheikh Radwan – një nga më të gjallat e qytetit, e cila ndodhet pranë spitalit Al-Shifa.

Situata në terren mbetet jashtëzakonisht e rëndë – shkalla, intensiteti dhe ritmi i zhvillimeve kanë shndërruar këto zona në hapësira të pabanueshme.

Civilët po zhvendosen drejt skajit perëndimor të qytetit të Gazës. Nga ajo anë, horizonti i qytetit shihet i mbuluar me tym të zi e të bardhë që ngrihet nga ndërtesat e shkatërruara.

Për civilët atje, është vetëm çështje kohe deri sa të përballen me shkatërrimin në masë.