Pas kritikave, Reuters me reagim të vakët për vrasjen e gazetarit në Gaza nga Izraeli
Reuters ka publikuar një njoftim vdekjeje për Hussam al-Masri, kameramanin palestinez të agjencisë, i cili u vra nga një sulm ushtarak izraelit në Spitalin Nasser.
Njoftimi përshkruan al-Masri, i lindur dhe rritur në Khan Younis, si “një kameraman me përvojë, i cili qasja e tij pozitive në situatat më të rrezikshme e bëri të popullarizuar mes komunitetit të ngushtë të gazetarëve në Gaza”.
“Ai ishte i fortë, i qëndrueshëm dhe guximtar në rrethanat më sfiduese,” tha Alessandra Galloni, kryeredaktore e Reuters. “Humbja e tij ndjehet thellësisht nga të gjithë ata në këtë redaksi që kanë punuar me të.”
Agjencia thekson se al-Masri filloi të punonte për Reuters në maj 2024, tetë muaj pas fillimit të luftës në Gaza. Së fundmi, ai ishte ngarkuar me filmimin e një fluksi të përditshëm për Reuters nga Spitali Nasser. Ai la pas një grua, e cila po lufton me kancer, dhe katër fëmijë, të moshave 15, 18, 22 dhe 23 vjeç.
Ky njoftim vdekjeje erdhi pas kritikave ndaj Reuters për mbulimin e sulmit vdekjeprurës që vrau al-Masri, si dhe për raportimin e përgjithshëm mbi luftën e Izraelit në Gaza.
“Agjencia e lajmeve Reuters nuk e përmendi kameramanin e tyre, i cili kishte punuar për ta për muaj me radhë, në titullin e artikullit. Në artikull, ata thjesht e përshkruan si një ‘kontraktor’ të Reuters,” raportoi dje nga Gaza Hind Khoudary e Al Jazeera.
