14 policë të Ramës të lënduar dhe 35 persona të shoqëruar pas protestës në Tiranë
Policia e Shtetit ka reaguar për situatën e krijuar gjatë protestës në Tiranë, duke bërë thirrje për ndalimin e menjëhershëm të akteve të dhunës dhe sulmeve ndaj punonjësve të policisë dhe institucioneve shtetërore.
Sipas njoftimit zyrtar, si pasojë e sulmeve që kanë vijuar prej disa orësh, janë plagosur 14 punonjës të Policisë së Shtetit.
Policia u ka bërë thirrje pjesëmarrësve në tubim që të distancohen nga personat e dhunshëm dhe të maskuar, duke theksuar se ushtrimi i së drejtës për të protestuar nuk justifikon sulmet ndaj efektivëve apo shkatërrimin e pronës publike dhe private.
“Rrezikimi i jetës së punonjësve të Policisë dhe të qytetarëve duhet të marrë fund menjëherë”, thuhet në reagimin e Policisë së Shtetit.
Ndërkohë, autoritetet bëjnë me dije se po vijojnë identifikimin dhe shoqërimin e personave të dyshuar për përfshirje në aktet e dhunës gjatë protestës.
Deri në momentin e reagimit zyrtar, 35 shtetas janë shoqëruar në polici. Sipas Policisë së Shtetit, personat përgjegjës për aktet e dhunshme do të identifikohen dhe do të përballen me ligjin.
