Zyrtarët palestinezë frikësohen se Izraeli po përdor sulmet ndaj Iranit për të forcuar kontrollin mbi xhaminë Al-Aksa

Izraeli mbylli të premten xhaminë Al-Aksa pa dhënë ndonjë konfirmim se kur do të rihapet kompleksi për besimtarët palestinezë.

Aoun Bazbaz, drejtor për çështje ndërkombëtare, diplomaci dhe turizëm në Waqf-in Islamik në Jerusalem, tha për Middle East Eye se është i shqetësuar se Izraeli po e përdor përshkallëzimin me Iranin si mbulesë për të ndërmarrë hapa të mëtejshëm drejt kontrollit të plotë mbi xhaminë Al-Aksa.

“Izraelitët kanë pretenduar se mbyllja ishte për ‘të mbrojtur njerëzit’ – por vetëm punonjësve të Waqf-it u është lejuar të hyjnë në Al-Aksa që atëherë,” tha Bazbaz, duke shtuar se problemi i vërtetë është se nuk ka garanci për rihapjen. “Kjo pasiguri është jashtëzakonisht e dyshimtë,” shtoi ai.

“Nuk ka asnjë dyshim se Izraeli po e përdor situatën e luftës për të vendosur kufizime të reja dhe për të krijuar fakte të reja në terren,” tha Bazbaz për MEE. “Ndërkohë që bota – dhe veçanërisht bota islame – është e përqendruar te Gaza dhe Irani, Izraeli po avancon qetësisht planet e tij në Al-Aksa.”

Bazbaz theksoi se për më shumë se 20 vjet, izraelitët kanë punuar për ndarjen e xhamisë në aspektin kohor dhe hapësinor, dhe sipas tij, “99 për qind e atij plani tashmë është zbatuar”.

“Orët e ditës janë për bastisje dhe turistë. Kjo është bërë normaliteti i ri,” tha ai.

Sipas tij, Bab al-Rahma, pjesa lindore e kompleksit, tashmë është riemërtuar dhe funksionon si një vend adhurimi për kolonët – një tempull i pashpallur.

“Vetëm dje, ata po vallëzonin atje duke falënderuar [ministrin e Sigurisë Kombëtare] Ben Gvir për atë që ka bërë në Al-Aksa,” tha Bazbaz.

Ai shtoi se ndryshimet në gjashtë apo shtatë muajt e fundit kanë qenë kaq të shpejta, sa as mediat nuk kanë arritur t’i ndjekin të gjitha zhvillimet.

“I thashë bashkëshortes dje, bazuar në atë që kam parë kohët e fundit, nuk do të befasohesha nëse së shpejti do t’i detyrojnë besimtarët të caktojnë termine përmes një aplikacioni, vetëm për të falur drekën apo akshamin,” tha Bazbaz.

“Tani, me luftën ndaj Iranit, jemi vërtet të shqetësuar se do të vijnë kufizime edhe më të rënda.”