Zëvendëskryeministri i Parë Bekim Sali takohet me rektorët e universiteteve për sfidat në arsimin e lartë
Zëvendëskryeministri i Parë Bekim Sali zhvilloi një takim me rektorët e Universiteti i Tetovës, Universiteti “Nënë Tereza” dhe Universiteti i Evropës Juglindore, ku u diskutua për sfidat aktuale me të cilat përballet sistemi i arsimit të lartë në vend.
Gjatë takimit u shkëmbyen mendime mbi nevojën për reforma të qëndrueshme dhe përmirësimin e cilësisë në arsim, ndërsa një pjesë e rëndësishme e diskutimit iu kushtua Ligjit për Arsimin e Lartë. Rektorët paraqitën propozime dhe sugjerime konkrete për avancimin e këtij ligji, me synim harmonizimin me standardet evropiane dhe rritjen e konkurrueshmërisë akademike.
Në përfundim, palët u dakorduan që të vazhdojë koordinimi i ndërsjellë institucional, me prioritet të përbashkët rritjen e cilësisë në arsim dhe avancimin e standardeve akademike në interes të studentëve dhe zhvillimit të vendit.
