Xi Jinping: Kina mbështet BE-në për ‘më shumë autonomi strategjike’
Presidenti kinez Xi Jinping ka biseduar me homologun e tij francez, Emmanuel Macron, dhe ka deklaruar se Pekini mbështet Bashkimin Evropian që të ketë më shumë autonomi strategjike.
Gjatë bisedës telefonike të enjten, Xi tha se që nga vizita e tij në Francë në majin e kaluar, bashkëpunimi mes dy vendeve ka shënuar shumë përparim.
“Kina gjithmonë e ka parë Evropën si një pol të pavarur në një botë multipolare, dhe e mbështet një BE që gëzon më shumë autonomi strategjike,” tha Xi, sipas një deklarate në X nga Mao Ning, zëdhënëse e Ministrisë së Jashtme kineze.
Presidenti kinez shtoi se vendi i tij është i gatshëm të punojë me BE-në për të përballuar sfidat globale dhe për të arritur rezultate që përfitojnë të dy palët dhe botën në tërësi.
“Kina dhe Franca, si dy anëtare të përhershme të Këshillit të Sigurimit të OKB-së, si vende të mëdha të pavarura dhe si themeluese e ndërtuese të rendit ndërkombëtar pas Luftës së Dytë Botërore, duhet të forcojnë solidaritetin dhe bashkëpunimin, të mbështesin autoritetin dhe rolin e OKB-së, të mbrojnë rregullat e tregtisë ndërkombëtare dhe rendin ekonomik botëror, si dhe të praktikojnë multilateralizmin e vërtetë,” tha ai.
Xi theksoi gjithashtu nevojën për thellimin e komunikimit strategjik mes palëve, ndërtimin e konsensusit dhe kapjen e mundësive për të forcuar bashkëpunimin në fusha tradicionale si investimet, aviacioni, hapësira, energjia bërthamore, etj.
“Gjithashtu, të zgjerojnë bashkëpunimin në fusha të reja si sektori dixhital, zhvillimi i gjelbër, biofarmaceutika dhe ekonomia e argjendtë, dhe të forcojnë lidhjet mes popujve për të promovuar miqësinë mes dy kombeve,” sugjeroi ai.
Macron rikonfirmoi dëshirën e Francës për të vazhduar ndërtimin e një marrëdhënieje të fortë ekonomike me Kinën.
“Investimet kineze janë të mirëpritura në Francë,” tha ai, duke theksuar se “kompanitë tona duhet të përfitojnë nga kushte të ndershme konkurrence në të dy vendet. Kjo është thelbësore.”
Lufta në Ukrainë
Duke iu referuar çështjeve ndërkombëtare, Macron tha se Franca dhe Kina ndajnë të njëjtin objektiv për luftën e Rusisë në Ukrainë: “një paqe e qëndrueshme dhe e fortë,” e cila, theksoi ai, duhet të fillojë me “një armëpushim të menjëhershëm dhe pa kushte.”
Lindja e Mesme
Për sa i përket Lindjes së Mesme, Macron nënvizoi nevojën për të ecur përpara drejt “një zgjidhjeje politike që garanton paqe dhe siguri për të gjithë.”
Ai vuri në dukje se Franca dhe Kina do të punojnë së bashku në kuadër të përgatitjeve për konferencën ndërkombëtare për zgjidhjen me dy shtete, e planifikuar për në qershor në Nju Jork, dhe që do të bashkëkryesohet nga Franca dhe Arabia Saudite.
Macron gjithashtu përshëndeti pjesëmarrjen në nivel të lartë të Kinës në Konferencën e ardhshme të OKB-së për Oqeanet.
