Xhaferi nuk përgjigjet nëse BDI-ja do t’i “dalë në mejdan” Taravarit për president

Kryetari i Qeverisë teknike, Talat Xhaferi nuk ndjen nevojë të komentojë vendimet e partive politike se kush do të jetë kandidati i tyre në zgjedhjet presidenciale.

“Nuk ndjej nevojë të komentoj vendimet e partive politike ashtu që çdo koment nga ana ime do të ishte i panevojshëm”, theksoi Xhaferi në përgjigje të pyetjes së gazetarëve për komentin në lidhje me informacionin se Arben Taravari do të jetë njëri nga kandidatët për president të shtetit, gjatë vizitës së sotme në komunën e Likovës.

I pyetur nëse BDI do të shkojë me një kandidat të pavarur në zgjedhjet e ardhshme presidenciale, Xhaferi tha se për këtë gazetarët duhet të shkojnë të pyesin në selinë e partisë në Reçicë të Vogël.