Vullnetarët restaurojnë dorëshkrime historike në Bibliotekën e Xhamisë së Madhe Omari në Gaza
Dorëshkrimet historike dhe veprat e rralla të vendosura në Bibliotekën e Xhamisë së Madhe Omari në Rripin e Gazës po rikthehen në jetë falë përpjekjeve të përkushtuara të vullnetarëve palestinezë, pasi u vunë në shënjestër gjatë më shumë se dy viteve sulme nga Izraeli, raporton Anadolu.
Një nga bibliotekat më të vjetra dhe më të pasura në Gaza, Biblioteka e Xhamisë së Madhe Omari, po ruhet me burime të kufizuara lokale kundër efekteve shkatërruese të luftës.
Vullnetarët po pastrojnë dhe klasifikojnë librat dhe dorëshkrimet e dëmtuara në sulmet izraelite dhe po kryejnë punime fillestare restaurimi.
Para luftës, biblioteka strehonte rreth 20.000 libra dhe dorëshkrime të rralla.
Vlerësimet fillestare të inventarit pas sulmit zbuluan se një pjesë e madhe e koleksionit ishte shkatërruar nën rrënoja ose ishte djegur. Deri më tani, vullnetarët kanë arritur të rikuperojnë afërsisht 4.000 vepra.
Seksioni perëndimor i bibliotekës ishte i ekspozuar drejtpërdrejt ndaj sulmeve dhe zjarrit, sipas Hanin al-Amassi, Drejtoreshë e Vullnetarëve Palestinezë që punon në Bibliotekën e Xhamisë së Madhe Omari.
Ajo tha se librat janë në gjendje shumë të keqe, me myk që përhapet midis faqeve dhe shtresa baruti që mbulojnë sipërfaqet e tyre.
Vullnetarët aktualisht po pastrojnë materialet e dëmtuara si pjesë e një ndërhyrjeje fillestare të “ndihmës së parë”, vuri në dukje ajo.
Al-Amassi shtoi se biblioteka përmban koleksione të rralla që datojnë që nga Perandoria Osmane dhe mbulon fusha të shumta të dijes dhe shkencës, duke theksuar se përpjekjet e restaurimit synojnë të ndihmojnë në ringjalljen e shpresës dhe në mbështetjen e jetës shkencore, intelektuale dhe kulturore të Gazës.
