Vriten 57.130 persona në sulmet izraelite ndaj Gazës

Të paktën 57.130 palestinezë janë vrarë në luftën gjenocidale të Izraelit në Gaza që nga tetori i vitit 2023, njoftoi Ministria e Shëndetësisë në Rripin e Gazës.

Në deklaratë thuhet se në 24 orët e fundit në spitale janë dërguar 118 trupa, ndërsa 581 persona janë plagosur, duke e çuar numrin e të plagosurve që nga fillimi i sulmeve në 135.173.

“Shumë viktima ndodhen ende nën rrënoja dhe në rrugë, por ekipet e shpëtimit nuk arrijnë t’u afrohen,” thuhet më tej në deklaratë.

Ministria theksoi gjithashtu se në 24 orët e fundit janë vrarë 12 palestinezë dhe janë plagosur 49 të tjerë ndërsa përpiqeshin të merrnin ndihmë humanitare, duke e çuar numrin e kërkuesve të ndihmës të vrarë nga zjarri izraelit në 652 dhe të plagosurve në 4.537 që nga 27 maji.

Ushtria izraelite rifilloi sulmet ndaj Gazës më 18 mars, duke shkelur marrëveshjen për armëpushim dhe shkëmbim të të burgosurve që hyri në fuqi në janar. Që atëherë, në Gaza janë vrarë 6.572 persona dhe janë plagosur 23.132.

Ndërsa bombardimet e pamëshirshme dhe vdekjeprurëse në Gaza po intensifikohen, familjet po përballen me urinë dhe mungesën e mjeteve bazë për mbijetesë, paralajmëruan Kombet e Bashkuara dhe agjencitë humanitare.

Gjykata Ndërkombëtare Penale lëshoi në nëntor të vitit të kaluar urdhra arresti për kryeministrin izraelit Benjamin Netanyahu dhe ish-ministrin e Mbrojtjes Yoav Gallant për krime lufte dhe krime kundër njerëzimit në Gaza.

Izraeli gjithashtu përballet me akuza për gjenocid në Gjykatën Ndërkombëtare të Drejtësisë.