Vriten 13 palestinezë në valën e re të sulmeve izraelite në Gaza
Të paktën 13 palestinezë u vranë dhe dhjetëra të tjerë u plagosën në sulmet e reja izraelite në Rripin e Gazës të shkatërruar nga lufta, njoftoi agjencia zyrtare palestineze e lajmeve Wafa, transmeton Anadolu.
Pesë palestinezë u vranë pasi forcat izraelite bombarduan një apartament në zonën Al-Mawasi në perëndim të Khan Younis, në jug të Rripit të Gazës.
Pesë persona të tjerë u vranë dhe më shumë se 30 u plagosën në një sulm ajror izraelit që synonte një shtëpi trekatëshe në “lagjen japoneze” në perëndim të qytetit.
Në një sulm të veçantë, tre palestinezë u vranë dhe disa të tjerë u plagosën kur forcat izraelite bombarduan një shtëpi në kampin e refugjatëve Al-Maghazi në Gazën qendrore.
Izraeli ka vendosur një bllokadë në Gazë për 18 vjet dhe që nga 2 marsi ka mbyllur të gjitha kalimet, duke përkeqësuar kushtet humanitare në enklavë.
Duke refuzuar thirrjet ndërkombëtare për armëpushim, ushtria izraelite ka vazhduar ofensivën brutale në Rripin e Gazës që nga 7 tetori 2023, duke vrarë gati 60 mijë palestinezë, shumica prej tyre gra dhe fëmijë. Bombardimet e pamëshirshme kanë shkatërruar enklavën dhe kanë çuar në mungesë ushqimesh.
Nëntorin e kaluar, Gjykata Ndërkombëtare Penale (GJNP) lëshoi urdhër-arreste për kryeministrin izraelit, Benjamin Netanyahu dhe ish-ministrin e tij të Mbrojtjes, Yoav Gallant për krime lufte dhe krime kundër njerëzimit në Gaza.
Izraeli përballet gjithashtu me padi për gjenocid në Gjykatën Ndërkombëtare të Drejtësisë (GJND) për luftën e tij në Rripin e Gazës.
