Vrasja e kameramanit të AA-së nga sulmi izraelit, bëri jehonë në shtypin ndërkombëtar
Për vrasjen e kameramanit të AA-së, Al-Sawaf, i cili punonte si reporter i pavarur në Rripin e bllokuar të Gazës nga sulmet ajrore të Izraelit pas “pauzës humanitare” për konfliktin në rajon, raportoi edhe shtypi ndërkombëtar.
Në lajmin e CNN, u përmend deklarata e gazetarit të AA-së, Enes Canlı se Montaser u plagos në fytyrë më 18 nëntor dhe se familjarët e tij humbën jetën nga sulmet. Krahas kësaj në lajm u tërhoq vëmendja dhe një postim i Montaser-it në platformën e medias sociale Instagram, në të cilin ai paraqiti fotografitë e tij për plagosjen në sy.
Në postimin e Montaser-it përfshihen deklarata për humbjen e jetëve të shkaktuara nga sulmet e Izraelit në Gaza dhe se mjekët do të vazhdojnë detyrën e tyre pavarësisht se spitalet nuk janë funksionale.
Përveç CNN për vrasjen e Montaser-it raportuan edhe faqet e lajmeve të tilla si “The Guardian”, agjencia spanjolle “Europa Press”, agjencia zyrtare palestineze WAFA, “Middle East Monitor”, “Barron’s”, “Palestine Chronicle”, “Lorient-Le Jour” që transmeton frëngjisht me qendër në Liban dhe nga “Arab News” e cila transmeton në anglisht dhe frëngjisht me qendër në Arabinë Saudite.
– Mesazh ngushëllimi nga Drejtori i Përgjithshëm i AA-së
Drejtori i Përgjithshëm dhe kryetari i Bordit të Drejtorëve të AA-së, Serdar Karagöz, publikoi një mesazh ngushëllimi pas vrasjes së Montaser-it nga sulmi izraelit.
“Që nga fillimi i luftës, kemi humbur 71 kolegë gazetarë nga sulmet e administratës izraelite në Gaza. Për fat të keq, punonjësi i agjencisë sonë, Montaser Al-Sawaf humbi jetën në këto sulme. Si Agjenci Anadolu, ne bëjmë përpjekje për sigurinë e jetës së kolegëve tanë që përmbushin detyrat e tyre me shumë përkushtim në kushte shumë të vështira në Gaza. Ne do të vazhdojmë luftën tonë për të siguruar që ata që kryen këto sulme të mbahen përgjegjës përpara ligjit ndërkombëtar, si në emër të Montaser Al-Sawafit, ashtu edhe në emër të të gjithë kolegëve tanë që kanë humbur jetën në sulmet e qeverisë izraelite në Gaza. Zoti e mëshiroftë kolegun tonë dhe të gjithë kolegët që kanë humbur jetën në Gaza dhe u shpreh ngushëllimet e mia të afërmve të tij”, tha Karagöz.
“Sot, bombat e hedhura nga administrata izraelite mbi Palestinën nuk bien vetëm mbi fëmijët palestinezë, spitalet, shkollat, xhamitë dhe kishat. Ato bien gjithashtu mbi vlerat perëndimore, ligjin ndërkombëtar, të drejtat e njeriut dhe mbi gjithçka që përfaqëson mirësinë dhe i shkatërrojnë ato vlera. Një nga humbësit kryesorë në këtë krizë janë këto vlera dhe komuniteti ndërkombëtar që është zhveshur nga këto vlera”, theksoi Karagöz.
Kameramani i AA-së, Montaser Al-Sawaf, i cili punonte si reporter i pavarur në Rripin e Gazës nën bllokadë, humbi jetën dje në një sulm ajror të Izraelit.
