Von der Leyen mbron sanksionet e propozuara ndaj Izraelit
Presidentja e Komisionit Evropian, Ursula von der Leyen ka mbrojtur sanksionet e gjera që autoriteti i saj propozoi ndaj Izraelit këtë javë, në përgjigje të operacioneve të tij ushtarake në Rripin e Gazës.
Në një intervistë me shkrim për LENA-n (Leading European Newspaper Alliance), ku përfshihet edhe gazeta gjermane ”Welt am Sonntag”, ajo tha se e dinte që sulmet mizore të udhëhequra nga Hamasi në tetor 2023 e kishin tronditur Izraelin në thelb.
“Por, zhvillimet e fundit janë veçanërisht shqetësuese, me një zi buke të shkaktuar nga njeriu dhe tharjen financiare të Autoritetit Palestinez”, tha ajo në komentet e publikuara të dielën.
Von der Leyen theksoi se zgjidhja me dy shtete, e cila parashikon një shtet palestinez që bashkëjeton në mënyrë paqësore me Izraelin, është e vetmja perspektivë për paqe të qëndrueshme afatgjatë në rajon.
“Ajo që kemi parë nga qeveria izraelite në muajt e fundit është një përpjekje e qartë për të minuar zgjidhjen me dy shtete. Kjo është arsyeja pse komisioni vendosi të veprojë dhe propozoi një paketë “masash të synuara dhe proporcionale për të gjetur një zgjidhje”, tha ajo.
Të mërkurën, komisioni propozoi një sërë masash ndëshkuese për të bindur qeverinë e kryeministrit Benjamin Netanyahu të ndryshojë kursin në luftë.
Këto përfshinin pezullimin e disa preferencave tregtare që mbulojnë afërsisht një të tretën e mallrave izraelite të eksportuara në Bashkimin Evropian, dhe masa që synojnë veçanërisht politikanë radikalë izraelitë, siç janë ministri i Financave, Bezalel Smotrich dhe ministri i Sigurisë Kombëtare, Itamar Ben-Gvir.
