Von der Leyen: Koha e iluzioneve ka mbaruar!
Koha e iluzioneve ka mbaruar dhe Evropa duhet të rrisë ndjeshëm shpenzimet e saj për armatim, tha presidentja e Komisionit Evropian Ursula von der Leyen sot në Strasburg.
“Nevojitet një rritje shumë e shpejtë e aftësive evropiane të mbrojtjes. Dhe kjo duhet të bëhet menjëherë”, tha ajo para Parlamentit Evropian.
“Ka ardhur koha për të krijuar një mbrojtje të përbashkët”, shtoi ajo, duke prezantuar rezultatet e samitit të fundit të 27 evropianëve, kushtuar mbrojtjes së kontinentit.
Von der Leyen përshëndeti konsensusin e vendeve anëtare të Bashkimit Evropian për nevojën për të forcuar aftësitë mbrojtëse të BE-së dhe tha se kjo “ishte absolutisht e paimagjinueshme disa javë më parë”.
Rendi i prishur i sigurisë
Vënia në pikëpyetje e angazhimit amerikan në Evropë, e veçanërisht në Ukrainë, pas kthimit të Donald Trump në presidencën amerikane, ka pasur efektin e goditjes elektrike, shkruan AFP.
“Rendi evropian i sigurisë është prishur dhe iluzionet tona të shumta janë shkatërruar”, tha presidentja e Komisionit Evropian. Në këtë kontekst, Evropës i kërkohet të marrë përgjegjësi më të madhe për mbrojtjen e saj, shtoi ajo.
Komisioni Evropian ka paraqitur një plan për të riarmatosur Evropën, i cili duhet të lejojë mobilizimin e rreth 800 miliardë eurove gjatë katër viteve, nga të cilat 150 miliardë euro në kredi të Komisionit Evropian të vëna në dispozicion të 27 shteteve anëtare.
Udhëheqësit e 27 shteteve të Bashkimit Evropian i kanë dhënë dritën jeshile planit dhe Komisioni Evropian tani do të paraqesë propozime konkrete përpara samitit të ardhshëm të BE-së, të planifikuar për javën e ardhshme.
