Volkswagen do të shkurtojë 50,000 vende pune, shkak tarifat e Trump dhe rënia e shitjeve në Kinë
Prodhuesi më i madh i makinave në Evropë, Volkswagen do të shkurtojë 50,000 vende pune deri në vitin 2030, ndërsa përballet me rënie të shitjeve në Kinë dhe Amerikën e Veriut dhe tarifat e vendosura nga presidenti amerikan, Donald Trump.
Volkswagen tha se vendet e punës do të ulen në Gjermani, duke prekur të gjithë grupin, si pjesë e një nisme ristrukturimi në dritën e klimës globale të biznesit në rënie.
Grupi kishte arritur tashmë një marrëveshje me sindikatat gjermane në fund të vitit 2024 për të shkurtuar 35,000 vende pune deri në vitin 2030, pjesërisht për shkak të largimit natyror të punonjësve përmes daljes në pension dhe largimeve të tjera të stafit.
Volkswagen zbuloi planet e përditësuara ndërsa njoftoi një rënie prej 54% të fitimeve para taksave. Grupi ka ulur objektivat e tij për prodhimin e automjeteve elektrike (EV) në muajt e fundit, duke përfshirë edhe prodhuesin e saj italian të supermakinave, Lamborghini.
Ndërsa veprimi ushtarak SHBA-Izrael kundër Iranit nxit pasigurinë e tregut dhe rrit çmimet e energjisë, Volkswagen paralajmëroi se turbulencat globale do të ndikonin negativisht në perspektivën e saj.
“Priten sfida në veçanti nga mjedisi makroekonomik, pasiguritë në lidhje me kufizimet në tregtinë ndërkombëtare dhe tensionet gjeopolitike”, tha kompania.
Sipas kompanisë kjo do të rriste intensitetin konkurrues dhe paqëndrueshmërinë në tregjet e mallrave, energjisë dhe këmbimit valutor.
Drejtori ekzekutiv i Grupit Volkswagen, Oliver Blume, tha më vonë se lufta në Iran nuk po godiste zinxhirin e furnizimit të Volkswagen, por mund të ndikonte në kërkesën për markat e saj premium Audi dhe Porsche.
