VLEN: Çmimet nuk lëvizin – Qeveria mban fjalën për stabilitet ekonomik

Ministria e Ekonomisë ka dalë me të dhëna konkrete të cilat, sipas Ministrisë kanë dhënë rezultate pozitive dhe ka paralajmëruar zgjerimin e listës së produkteve me çmime të kufizuara.

Komunikata e plotë e Ministrisë së Ekonomisë:

Të gjithë e dimë se në kohë krize ekonomike çdo denar vlen. Dhe çdo ndryshim në treg ndikon drejtpërdrejt në jetën e përditshme të qytetarëve tanë – në bukën që blejmë, vajin, sheqerin apo produktet higjienike.

Prandaj, si Ministri e Ekonomisë dhe Punës, që nga dita e parë jemi përkushtuar të mbrojmë standardin e jetesës së qytetarëve dhe të garantojmë stabilitetin e çmimeve.
Falë masave të marra që nga fillimi i vitit – përfshirë kufizimin e marzheve në ushqime dhe produkte higjienike – sot kemi rezultate konkrete.

Të dhënat zyrtare tregojnë se:

-Inflacioni për muajin prill është praktikisht zero krahasuar me muajin mars, një rritje prej 0.6%;
-Krahasuar me prillin e vitit të kaluar, inflacioni është 2.6%;
-Çmimet e ushqimeve janë pothuajse të pandryshuara – vetëm 0,3% rritje vjetore, dhe një rënie prej -1,3% krahasuar me dhjetorin 2024.

Këto janë fakte që tregojnë se ekonomia është më e qëndrueshme, dhe qytetarët nuk po përballen me rritje të papërballueshme të çmimeve. Por, ne nuk do të ndalemi këtu.
Në bashkëpunim me Inspektoratin Shtetëror të Tregut, ne monitorojmë dinamikën e çmimeve në baza ditore. Deri më tani nuk ka pasur rritje të ndjeshme pas përfundimit të masës. Por nëse dikush përpiqet të abuzojë me situatën – ne do të reagojmë menjëherë.

Dhe reagimi do të jetë vendimtar:

-Mund ta zgjerojmë listën e produkteve me çmime të kufizuara;
-të vendosim marzhe për të gjitha produktet;
-Ose të risim kufizimet ekzistuese.

Së fundmi, Ministria e Ekonomisë dhe Punës mbetet e përkushtuar për ruajtjen e stabilitetit ekonomik dhe mbrojtjen e standardit të jetesës së qytetarëve.
Me përgjegjësi, vendosmëri dhe në bashkëpunim me institucionet kompetente do të vazhdojmë të marrim masat e nevojshme për të siguruar një treg fer dhe të qëndrueshëm për të gjithë.