VLEN: 30 vjet nga gjenocidi në Srebrenicë, kujtesë kolektive kundër harresës

Sot, në 11 korrik, përkujtojmë njërën nga tragjeditë më të errëta të historisë moderne të Evropës, gjenocidin në Srebrenicë, ku në korrikun e vitit 1995 u vranë 8.372 njerëz.

Sivjet shënohet 30-vjetori i kësaj masakre të planifikuar dhe ekzekutuar nga regjimi kriminal i Millosheviqit, Karaxhiqit dhe Mlladiqit, përballë heshtjes së turpshme të botës së ashtuquajtur të qytetëruar. Viktimat e Srebrenicës nuk janë thjesht shifra, ato janë histori të ndërprera, familje të shkatërruara dhe dhimbje e pashlyeshme që vazhdon edhe sot, teksa qindra trupa ende mbeten në varre masive, pa një prehje dinjitoze në Potoçari.

Sot, përfaqësues të lartë të VLEN, të rinj e qytetarë, morën pjesë në ceremoninë përkujtimore te Memoriali në Parkun e Çairit, për të nderuar viktimat dhe për të dërguar një mesazh të qartë: Drejtësia për Srebrenicën nuk është vetëm kujtesë historike, por një detyrim moral dhe kusht për paqe të qëndrueshme në rajon.

VLEN u shpreh solidaritet të plotë me familjet e viktimave, dhe njëkohësisht dënon fuqishëm çdo përpjekje për të relativizuar ose mohuar gjenocidin.

Kujtesa është armë kundër përsëritjes. Drejtësia është borxh që nuk parashkruhet.