Virginia Giuffre, akuzuesja e Epstein dhe Princit Andrew, vdes nga vetëvrasja

Virginia Giuffre – e cila akuzoi Jeffrey Epstein dhe Princin Andrew për abuzim seksual – ka ndërruar jetë nga vetëvrasja në moshën 41-vjeçare, njoftoi familja e saj.

Giuffre ishte një nga viktimat më të njohura të shkelësve të dënuar të seksit, Epstein dhe ish-partneres së tij, Ghislaine Maxwell. Ajo pretendonte se ishte trafikuar tek Duka i York-ut kur ishte 17 vjeç – një akuzë që Princi Andrew e ka mohuar vazhdimisht.

Familja e saj tha se ajo vdiq të premten në Australinë Perëndimore, ku kishte jetuar prej disa vitesh.

“Virginia ishte një luftëtare e ashpër në betejën kundër abuzimit seksual dhe trafikimit të qenieve njerëzore. Ajo ishte drita që ngriti shumë të mbijetuar,” tha familja në një deklaratë. “Pavarësisht gjithë vështirësive që përjetoi, ajo shkëlqeu fort. Do të na mungojë pa masë.”

Policia në Australinë Perëndimore tha se ishte thirrur në një pronë në Neergabby – një zonë rurale në periferi të Perth-it – vonë të premten. Ata konfirmuan vdekjen e një gruaje 41-vjeçare, pa e bërë të ditur emrin, dhe thanë se përpjekjet për ta ringjallur kishin qenë të pasuksesshme. Nuk dyshohet për ndonjë vepër penale.

Giuffre, e lindur në Shtetet e Bashkuara, jetonte me bashkëshortin e saj Robert dhe fëmijët në periferi të North Perth-it. Megjithatë, raportet e fundit sugjeronin se çifti ishin ndarë pas 22 vitesh martesë.

Tre javë më parë, Giuffre kishte postuar në Instagram se kishte pësuar lëndime të rënda nga një aksident automobilistik. Familja e saj më vonë tha se ajo nuk kishte dashur që postimi të bëhej publik, ndërsa policia lokale kundërshtoi ashpërsinë e incidentit.

Sipas dokumenteve gjyqësore të publikuara në vitin 2019, Giuffre kishte takuar Ghislaine Maxwell në fillim të viteve 2000, ndërsa punonte si asistente në një qendër spa në resortin Mar-a-Lago të Donald Trump në Florida.

Midis viteve 2000 dhe 2002, ajo kaloi kohë me Epstein dhe Maxwell – duke udhëtuar mes shtëpive të Epstein në Palm Beach dhe Manhattan – dhe duke vizituar edhe fermën e tij në New Mexico dhe ishullin privat Little Saint James.

Gjatë kësaj kohe, Giuffre thuhet se kishte takuar Princin Andrew. Në mars të vitit 2001, u bë fotografia tashmë famëkeqe ku ajo shihet pranë Andrew-t, me dorën e tij rreth belit të zhveshur të saj, në shtëpinë e Maxwell në Londër.

Giuffre ishte ndër zërat e parë që kërkoi ndjekjen penale të Epstein. Ai u akuzua për trafikim seksual në korrik 2019 dhe autoritetet thonë se vdiq nga vetëvrasja disa javë më vonë në qelinë e tij në Nju Jork.

Ghislaine Maxwell u shpall fajtore për ndihmën që i dha Epstein në abuzimin me vajzat adoleshente dhe aktualisht po vuan një dënim prej 20 vitesh në një burg në Florida.

Në vitin 2022, Giuffre arriti një marrëveshje civile me Princin Andrew, e cila raportohet të ketë vlerën rreth 12 milionë dollarë, pa ndonjë pranim fajësie nga ana e princit, i cili vazhdon t’i mohojë akuzat.

Presidenti i SHBA-së, Donald Trump, kishte premtuar të publikonte të gjitha dokumentet që lidhen me rastin Epstein, përfshirë emrat e bashkëpunëtorëve të fuqishëm. Grupi i parë i dosjeve u bë publik në shkurt, por nuk solli zbulime të mëdha. Vetë Trump është përmendur si një bashkëpunëtor i Epstein.

Pas akuzave të saj publike, Giuffre u bë një aktiviste e njohur dhe një zë qendror në lëvizjen Me Too. /Al Jazeera/