Venezuelë, mijëra njerëz marshojnë në protestën kundër “kërcënimeve” të SHBA-së
Mijëra njerëz dolën në rrugë në të gjithë Venezuelën për të protestuar kundër asaj që e përshkruan si kërcënim në rritje të SHBA-së kundër vendit dhe për të shprehur mbështetje për presidentin Nicolas Maduro, transmeton Anadolu.
Në kryeqytetin Karakas, protestuesit mbushën rrugët gjatë “Marshimit të Flamurit dhe Shpatës së Çlirimtarit Simon Bolivar”, duke mbajtur flamuj të mëdhenj venezuelianë dhe duke dënuar vendosjen e ushtrisë amerikane në Karaibe.
Pjesëmarrësit e kritikuan vendosjen si “kërcënim dhe sulm” ndërsa shumë marshuan me fotografi të Maduros dhe brohoritën slogane pro-qeveritare. Oficerët e policisë, ushtarët, anëtarët e milicisë dhe një numër i madh civilësh iu bashkuan marshimit, i cili siç thanë organizatorët, kishte për qëllim të tregonte unitet kundër çdo ndërhyrjeje të mundshme të SHBA-së.
Duke ecur përkrah protestuesve, ministri i Brendshëm Diosdado Cabello tha se “populli venezuelian po bëhet më i bashkuar çdo ditë dhe është i vendosur të mbrojë lirinë e tij”.
Ai paralajmëroi se vendi do të mbrohet me të gjitha mjetet e disponueshme. “Kohët e fundit, kërcënimet e imperializmit dhe sulmet nga ata që mendojnë se sundojnë botën janë rritur. Qëllimi i tyre është të kapin burimet natyrore të Venezuelës”, tha Cabello.
– “Venezuela është e përgatitur të zmbrapsë çdo sulm”
Protesta erdhi vetëm disa ditë pasi SHBA-ja e shpalli “Cartel de los Soles” rrjet kriminal që Washingtoni pretendon se drejtohet nga Maduro dhe zyrtarë të lartë venezuelianë si një organizatë e huaj terroriste.
Qeveria venezueliane e dënoi këtë veprim, duke e quajtur atë një përpjekje për të shpikur pretekst për ndërhyrje. Zyrtarët amerikanë kanë vendosur transportuesin më të madh të avionëve në botë “USS Gerald R. Ford” së bashku me grupin e saj të sulmit në rajonin e Amerikës Latine, duke e përshkruar veprimin si pjesë të operacioneve ndërkombëtare kundër narkotikëve.
Maduro u përgjigj duke mobilizuar 4.5 milionë anëtarë të milicisë në të gjithë vendin. Ai ka thënë se “Venezuela është e përgatitur të zmbrapsë çdo sulm”.
