Vendet arabe dënojnë Izraelin, bëjnë thirrje për përmbajtje

Katari i është bashkuar dënimeve nga bota arabe ndaj sulmeve izraelite kundër Iranit.

Kryeministri i Katarit, Sheikh Mohammed bin Abdulrahman bin Jassim Al Thani, deklaroi se “veprimet absurde” të Izraelit vazhdojnë të shkatërrojnë mundësitë për paqe dhe përbëjnë një rrezik të menjëhershëm për sigurinë globale.

Ministria e Punëve të Jashtme e Katarit e përshkroi sulmin si një “shkelje të qartë” të të drejtës ndërkombëtare dhe bëri thirrje për përmbajtje.

Emiratet e Bashkuara Arabe dënuan sulmet “me termat më të ashpër” dhe “theksuan rëndësinë e ushtrimit të përmbajtjes maksimale dhe gjykimit të matur” për të shmangur përshkallëzimin e mëtejshëm.

Edhe Egjipti dënoi sulmet, duke paralajmëruar për “pasoja të paprecedenta ndaj sigurisë dhe stabilitetit të Lindjes së Mesme”.