Ushtria izraelite vazhdon të bombardojë Rripin e Gazës, pavarësisht armëpushimit

Ushtria izraelite kreu një valë të re sulmesh ajrore dhe granatimesh me artileri në zonat e kontrolluara nga ushtria në veri dhe jug të Rripit të Gazës, duke shkelur një armëpushim tashmë të brishtë në territorin e pushtuar, transmeton Anadolu.

Dëshmitarët thanë për Anadolu se forcat izraelite kryen sulme ajrore intensive në pjesët perëndimore të qytetit jugor të Rafah, ndërsa artileria izraelite granatoi zonat lindore.

Anijet luftarake izraelite hapën zjarr nga deti drejt Khan Younis, duke shkaktuar panik midis të zhvendosurve në zonë

Në Gazën veriore, ushtria izraelite kreu operacione shkatërrimi brenda lagjes Shujaiya, në lindje të Qytetit të Gazës, mes fluturimeve intensive me dronë mbi hapësirën ajrore të zonës.

Sulmet e fundit ndodhën pavarësisht një marrëveshjeje armëpushimi që hyri në fuqi në Gaza më 10 tetor sipas planit të Presidentit amerikan, Donald Trump, duke i dhënë fund dy viteve të gjenocidit izraelit që ka vrarë më shumë se 70.000 njerëz, kryesisht gra dhe fëmijë, dhe ka plagosur gati 171.000 të tjerë që nga tetori i vitit 2023.

Sipas Ministrisë së Shëndetësisë së Gazës, të paktën 376 palestinezë janë vrarë që nga 10 tetori, në shkeljet e armëpushimit nga Izraeli në enklavë.