Ushtria izraelite tërhiqet nga Bregu Perëndimor pas ofensivës 10-ditore, lënë pas vde*kje dhe shkatërrim të gjerë

Ushtria izraelite të premten herët u tërhoq nga qyteti i Jeninit dhe kampi i tij i refugjatëve në pjesën veriore të Bregut Perëndimor të pushtuar pas 10 ditësh inkursioni dhe sulmesh, duke rezultuar në vdekje dhe shkatërrim të gjerë, transmeton Anadolu.

Forcat izraelite dolën nga qyteti dhe kampi i Jeninit pas 10 ditësh sulmesh që vranë dhe plagosën dhjetëra njerëz, duke lënë pas rrënoja të konsiderueshme, tha agjencisë zyrtare palestineze e lajmeve Wafa.

Banorët e Jeninit kanë shprehur frikë se ushtria izraelite do të kthehet në qytet dhe kamp për të nisur sulme të mëtejshme pas tërheqjes dhe pozicionimit në pikat e kontrollit ushtarak përreth, siç ka ndodhur në mënyrë të përsëritur në të kaluarën.

Forcat izraelite shkatërruan rrugët kryesore në Jenin, kampin e refugjatëve dhe infrastrukturën në zonën në lindje të qytetit. Linjat e ujit, elektricitetit dhe komunikimit u ndërprenë si pasojë e gërmimeve dhe rrënojave të kryera nga makineritë izraelite të ndërtimit në afërsi.

Ushtria izraelite më 28 gusht filloi fushatën e saj më të gjerë ushtarake në veri të Bregut Perëndimor në dy dekada.

Tensionet janë intensifikuar në gjithë Bregun Perëndimor të pushtuar ndërsa Izraeli po vazhdon me ofensivën e tij në Rripin e Gazës, e cila ka vrarë mbi 40.800 palestinezë, kryesisht gra dhe fëmijë, që nga 7 tetori i vitit të kaluar.

Të paktën 691 palestinezë janë vrarë dhe më shumë se 5.700 janë plagosur nga të shtënat izraelite në Bregun Perëndimor që nga ajo kohë, sipas Ministrisë së Shëndetësisë.