UNRWA: Gaza dërgon “mesazhe të dëshpëruara urie” ndërsa ndihmat e grumbulluara jashtë mbeten të bllokuara
Agjencia e Kombeve të Bashkuara për refugjatët palestinezë (UNRWA) ka ngritur alarmin për mungesa të rënda ushqimore, duke raportuar se po merr “mesazhe të dëshpëruara për uri” nga civilët dhe madje edhe nga stafi në terren, transmeton Anadolu.
“Po marrim mesazhe të dëshpëruara për urinë nga Gaza, përfshirë edhe nga kolegët tanë”, tha agjencia në platformën X.
“Çmimet e ushqimeve janë rritur 40-fish”, theksoi agjencia.
Agjencia qarkulloi një faturë që tregonte se 1 kilogram sheqer tani kushton 100 dollarë, ndërsa mielli, orizi dhe thjerrëzat variojnë nga 23 deri në 30 dollarë për kilogram, duke arritur në një total prej 183 dollarësh vetëm për katër artikuj bazë.
Pavarësisht kësaj krize në përshkallëzim, agjencia konfirmoi se “pak jashtë Gazës, e grumbulluar në depo, UNRWA ka ushqim të mjaftueshëm për të gjithë popullsinë për më shumë se tre muaj”.
“Vuajtjet në Gaza janë të shkaktuara nga njeriu dhe duhet të ndalen”, vuri në dukje agjencia, duke bërë thirrje për heqjen e menjëhershme të rrethimit dhe hyrjen e sigurt dhe në shkallë të gjerë të ndihmës humanitare.
Sipas Ministrisë së Shëndetësisë në Gaza, të paktën 18 persona kanë vdekur nga uria vetëm gjatë 24 orëve të fundit, duke nxjerrë në pah katastrofën humanitare në përshkallëzim, ndërsa bombardimet dhe privimet e pamëshirshme po i shtyjnë civilët përtej pragut të greminës.
Izraeli ka vrarë gati 59.000 palestinezë, shumica prej tyre gra dhe fëmijë, në Rripin e Gazës që nga tetori i vitit 2023. Fushata ushtarake ka shkatërruar enklavën, ka shembur sistemin shëndetësor dhe ka çuar në mungesa të mëdha ushqimore.
Në nëntorin e kaluar, Gjykata Ndërkombëtare Penale lëshoi urdhërarreste për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.
Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavë.
