UNICEF: Në Afrikën Perëndimore dhe Qendrore rreth 80.000 fëmijë ndodhen nën rrezikun e kolerës
Fondi Ndërkombëtar i Kombeve të Bashkuara për Fëmijë (UNICEF) ka deklaruar se afërsisht 80.000 fëmijë janë në rrezik të lartë për shkak të shpërthimit të kolerës që përhapet në 12 vende në Afrikën Perëndimore dhe Qendrore, dhe se nevojiten 20 milionë dollarë për reagim emergjent, transmeton Anadolu.
Në një deklaratë të bërë nga UNICEF njoftohet se afërsisht 80.000 fëmijë janë në rrezik të lartë për shkak të shpërthimit të kolerës në Afrikën Perëndimore dhe Qendrore.
Deklarata vë në dukje se në Republikën Demokratike të Kongos (RDK), një nga vendet më të goditura nga shpërthimi i kolerës, janë regjistruar më shumë se 38.000 raste dhe 951 vdekje në korrik, ku 25,6 për qind të rasteve e përbëjnë fëmijët nën moshën 5-vjeç.
Numri i rasteve të prekura nga shpërthimi në kryeqytetin Kinshasa është rritur me shpejtësi në javët e fundit dhe norma e vdekjeve është rritur në 8 për qind.
Deklarata vë në dukje se Nigeria ka regjistruar më shumë se 3.000 raste të dyshuara të kolerës dhe 86 vdekje deri në fund të qershorit dhe se vendi renditet në vendin e dytë më të prekur në rajon.
Shpërthimi vazhdon në Çad, Republikën e Kongos, Ganë, Bregun e Fildishtë dhe Togo, theksohet në deklaratën në të cilën thuhet se gjendja e alarmit të lartë mbetet në fuqi në Niger, Liberi, Benin, Republikën Qendrore Afrikane dhe Kamerun.
Më tej informohet se 55 raste të dyshuara të kolerës dhe katër vdekje u raportuan në kampin e refugjatëve Dougui pranë qytetit të Abeche në Çad, ndërsa nënvizohet se fëmijët përbëjnë shumicën e popullsisë së kampit dhe se higjiena dhe kanalizimet e dobëta mund të kontribuojnë në përhapjen e shpejtë të shpërthimit.
UNICEF ka siguruar furnizime shëndetësore, uji, sanitare dhe higjienike në rajon që nga fillimi i shpërthimit të kolerës, duke kryer aktivitete vaksinimi dhe duke rritur ndërgjegjësimin publik.
Gjithashtu në deklaratë thuhet se UNICEF ka nevojë për 20 milionë dollarë për reagimin rajonal ndaj emergjencave gjatë tre muajve të ardhshëm.
Drejtori Rajonal për Afrikën Perëndimore dhe Qendrore në UNICEF, Gilles Fagninou, tha se shirat e rrëmbyeshëm, përmbytjet e përhapura dhe zhvendosja rrisin rrezikun e transmetimit të kolerës dhe vazhdojnë të kërcënojnë jetën e fëmijëve.
